Piştî têkçûna çeteyên DAÎŞ’ê, bi hezaran malabatên çeteyan li Kampa Holê hatin bicihkirin, lewra ev kamp bû kampa herî xeternak ya cîhanê. Ji ber wê QSD, YPJ û Hêzên Ewlekariya Hundrîn li dijî vê xeteriyê operasyonên ewlehiyê li dar dixin. Herî dawî jî di 5’ê Mijdara 2024’an de pêngava bi navê ‘Ewlehiya Domdar’ hat lidarxistin.
Di sala 2019’an de piştî têkçûna çeteyên DAÎŞ’ê li Baxozê li ser destê şervanên QSD û YPJ’ê, bi hezaran malbatên çeteyên DAÎŞ’ê ku wekî kesên herî xeternak li ser mirovahioyê ne li Kampa Holê hatin bicihkirin. Tevî hewldanên Rêveberiya Xweser ya Bakur û Rojhilatê Sûriyeyê û tevahiya bangên wê ya ji tevahiya welatên cîhanê re ku welatiyên xwe yên DAÎŞ’î werbigrin jî ev yek pêk nehat û kombûna van malbatên çeteyan di kampê de bû xeteriyeke mezin li ser Bakur û Rojhilatê Sûriyeyê û tevahiya cîhanê. Her wiha li vê kampê jimareke mezin ji welatiyên Iraqî û koçberên Sûriyeyê jî lê bi cih dibin. Ewlehiya kampê jî ji aliyê Ewlehiya Taybet ya Bakur û Rojhilatê Sûriyeyê û Hêzên Hevpeymanî ve tê rêvebirin. Li gorî amarên fermî jimara kesên kampê 43 hezar û 477 kes e û ji wan jî 12 hezar û 101 jin û zarokên çeteyên DAÎŞ’ê ne. Ev malbatên çeteyên li kampê her dem dibin cihê xeteriyê li ser tevahiya cîhanê. Her wiha ew jî hewl didin ku hişmendiya DAÎŞ’ê belav bikin û zarokên xwe li ser vê hişmendiyê mezin û perwerde dikin.
Li hemberî vê xeteriyê, Rêveberiya Xweser a Bakur û Rojhilatê Sûriyeyê bi hêzên xwe yê ewlehî û leşkerî operasyonên ewlehiyê li dijî vê xeteriyê li dar dixin û planên çeteyên DAÎŞ’ê têk dibin.
Pêngavên ewlehiyê yên ku li dijî çeteyên DAÎŞ’ê li Kampa Holê hatine lidarxistin wiha ne:
1-Pêngava Mirovî û Ewlehiyê
Di 28’ê Adara 2021’an de hemleya destpekê ya bi navê Pêngava Mirovî û Ewlehiyê bi tevlîbûna hêzên ewlehiyê dest pê dike. Di vê pêngavê de ku ji aliyê Hêzên Ewlekariya Hundirîn û bi piştgiriya hêzên QSD, YPG û YPJ’ê 5 Hezar endamên ewlehiyê yên Bakur û Rojhilatê Sûriyeyê tevlî bûn. Vê pêngavê du qonaxan berdewam kir. 121 kes hatin girtin ku di nava wan de 15 jinên endamên rêxistina DAÎŞ’ê bûn. Her wiha 16 tûnel ku şaneyên DAÎŞ’ê ew ji bo veşartin û reva ji kampê bi kar dianîn, hatin dîtin. Di heman demê de gelek alavên ku ji bo kolandina van tûnelan bi kar dianîn, hatin desteserkirin. 119 kampên ku DAÎŞ’ê ji bo perwerde, dadgehên şerî, êşkence û kuştinê bi kar dianîn ji holê hatin rakirin. Her wiha 48 telefon, I pad, laptop û 2 hardên ku di têkiliyên navbera wan şaneyan de dihatin bikaranîn, hatin desteserkirin. Di encama kuştin û hewldana kontrolkirina kampê de, Hêzên Ewlekariya Hundirîn bi piştgiriya Hêzên Sûriyeya Demokratîk (QSD) û Yekîneyên Parastina Jin (YPJ) pêvajoya yekemîn a ‘Pêngav Mirovî û Ewlehiyê’ di 28`ê Adara 2021`an de da destpêkirin. Pêngav 5 rojan dewam kir û 2`yê Nîsanê bi dawî bû. Zêdetirî 5 hezar şervanên hêzên beşdar, tevlî pêngavê bûn.
2-Pêngava Mirovî û Ewlehiyê (Qonaxa 2’emîn)
Ji destpêka 2022`yan ve û heta 25`ê Tebaxa 2022`yan, şaneyên DAÎŞ`ê û malbatên wan 43 êriş pêk anîn. Di wan êrîşan de 44 niştecihên kampê bi kêr, tiving, çekên bêdeng hatin kuştin. Ji wan 14 jin û 2 jî zarok bûn. Termên wan qurbaniyan diavêtin kanalîzasyonê ji bo ku kiryarên terorî veşêrin. Her wiha çeteyên DAÎŞ`ê 13 caran hewl da niştecihên kampê birevînin. Kon tevî niştecihên wê bişewitînin, alîkariyên mirovî û tenduristiyê û xizmetguzariyê jî telef bikin. Tevliheviyê çêkin û sûra li dora kampê rakin. Hêzên Ewlekariya Hundirîn bi piştgiriya QSD’ê û Koalîsyona Navneteweyî ya li dijî DAîŞ`ê pêvajoya duyemîn a pêngavê di 25`ê Tebaxa 2022`yan de da destpêkirin ku 24 rojan dewam kir.
Hêzên ku di wê pêvajoyê de, gelek noqte û cihên çeteyên DAÎŞ`ê yên ku fikrên tundraw fêr dikirin, tune kir, gelek jinên DAÎŞ`î yên xetere ku di wê demê de endam di nava kampê de perwerde dikirin, sûc li dijî niştecihên kampê kirine, girtin. Her wiha hêzê li dijî koma “Hisbê û Eşbalên El Xîlafe” pêngav li dar xist, gelek berpirsên wê girtin.
Di lêpirsînên wê demê de hate diyarkirin ku 3 jêderên çekan ên DAÎŞ`ê hene û di ya yekemîn de destê hin karmendên rêxistinan tê de heye. Bi taybet jî ‘Rêxistina Bihar’ ku çek û pere derbasî kampê dikirin û revandina endam û çeteyên DAÎŞ`ê hêsan dikir. Jêdera duyemîn jî çekên ferdî û bombe ne ku hevserên çeteyan û zarokên wan di nav cil û bergên xwe de vedişartin dema ji Baxozê reviyan. Jêdera sêyemîn jî, DAÎŞ`ê derfetên ji rêxistinan re hatine pêşkêşkirin, bi kar anîn û amûrên tûj wekî xencer, kêr, bato û amûrên êşkencekirinê çêkirin û pê niştecihên kampê tirsandin û ew neçarî radestîyê kirin. Di wê pêvajoyê de, YPJ`ê 2 jinên ciwan ên Êzidî ji destê jinên DAÎŞ`ê xilas kirin û birin cihekî ewle. YPJ`ê, 4 jinên ku bi zincîran hatibûn girêdan û êşkence li wan hatibû kirin, xilas kirin. Her wiha di pêvajoya duyemîn de, 226 kes hatin girtin û di nava wan de 36 jin hebûn ku tevlî bûyerên kuştin û tirsandinê bûbûn. 25 tunel û xendek hatin dîtin û gelek çekên navîn û sivik hatin desteserkirin.
3- Ewlehiya Domdar
Ji bona paqijkirina çeteyên DAÎŞ’ê li Kampa Holê di 5’ê Mijdara 2024’an de pêngaveke bi navê Ewlehiya Domdar hate destpêkirin. Hêzên ewlehiyê yên Bakur û Rojhilatê Sûriyeyê bi daxuyanîyeke bi niviskî destpekirina pêngavê ragihand. Pêngav ji aliyê Hêzên Sûriyeya Demokratîk (HSD), Yekîneyên Parastina Jin (YPJ), Hêzên Ewlekariya Hundirîn û komek ji Îstixbarata Iraqî û bi piştevaniya Hêzên Hevpeymaniya Navdewletî ya li dijî DAÎŞê hate destpêkirin Hate plankirin pêngav 10 rojan berdewam bike.
Di roja yêkemîn ya pêngavê de, Hêzên Ewlekariya Hundirîn, Yekîneyên Parastina Jin (YPJ) û Hêzên Sûriyeya Demokratîk (QSD) ragihand ku li dijî şaneyên çeteyên DAÎŞˋê odeya pêngavên hevbeş ya bi navê Pêngava ˋEwlehiya Domdarˋ li kampa Holê û dora wê daye destpêkirin. Hêzên hevbeş heta niha nêzî 20 çete ji şaneyên DAîŞˋê girtin, yek jî hat kuştin, gelek çek û cebilxane hatine desteserkirin.
Operasyona Ewlehiya Domdar ya ku 6’ê mehê li bajarê Holê û gundewarên wê yên aliyê Bakur û Başûr hatibû destpêkirin, îro di roja xwe ya duyemîn de didome. Di van du rojan de gelek çeteyên DAÎŞ’ê ji aliyê şervanên YPJ, QSD û Hêzên Ewlekariya Hundirîn ve hatin girtin û amûrên leşkerî hatine desteserkirin. Dema ku çeteyekî hewl da ku êrîşê li ser şervanan bike, yekser mûdaxele lê hate kirin û ev çete hate bêbandorkirin. Hêzên ku beşdarî operasyonê bûne dan diyarkirin ku hetanî ewlehiya herêmê nekeve bin kontrolê, wê operasyonên wan bidomin.
Hêzên pêngavê di roja sêyemîn de bajarê Holê û derdorên wê, beşeke mezin ji kampê paqij kirin. Di lêgerînê de 16 çeteyên şaneyên rêxistina terorîst hatin girtin û hejmareke çek, cebilxane û pêdiviyên leşkerî jî hatin desteserkirin. Her wiha di nava kampê de 2 xendeqên veşartina çek û çeteyan hatin dîtin. Di pêngava lêgerînê de, endamên şaneyên rêxistina terorîst hewl da birevin û biçin beşên din ên kampê, lê hewldanên wan hatin pûçkirin û terorîst hatin girtin. Operasyona Ewlekariya Domdar di 6’ê Mijdarê de ji aliyê Hêzên Sûriyeya Demokratîk (HSD) û Hêzên Ewlekariya Hundirîn (asayiş) ve li Kampa Holê û derdora ve hate destpêkirin. Di nava 4 rojan de 73 çeteyên DAÎŞˈê û hevkarên wê hatine girtin. Armanca operasyonê, paqijkirina 100 kîlometreyên Kampa Holê û derdora wê (devera di navbera Hol, Til Hemîs, Hesekê, Eşîre û Şedadê de) ye.
