Êrîşa li herêma tûrîstîk a bi navê Pahalgamê êrîşa herî giran a 25 salên dawî ya li hemberî sivîlan bû.
Li gorî çavkaniyên nexweşxaneyê temamiya kesên jiyana xwe ji dest dan mêr bûn, tenê yek ji Nepalê bû û yên din hemû li Hindistanê diman.
Heta niha ti komê berpirsyariya êrîşê li xwe negirtiye. Hêzên ewlekariyê yên Hindistanê ji bo girtina êrîşkaran dest bi opreasyoneke berfireh kirin. Serokwezîrê Hindistanê Narendra Modî serdana xwe ya fermî ya li Erebistana Siûdî nîvco hişt, êrîş weke ‘êrîşeke namerdane’ pênase kir, şermezar kir û ragihand ku berpirsyar wê bêne darizandin.
Rêveberê herêma Cemmû û Keşmîrê Omar Abdullah jî bûyer weke bûyereke gelekî mezin a salên dawî pênase kir.
Artêşa Hindistanê diyar kir ku du kesên ku guman jê dihate kirin pêwendiya we bi êrîşê re hebû li herêma Baramûlla ya Keşmîrê hatin kuştin.
Keşmîr di navbera Hindistan û Pakistanê de ji sala 1947’an û vir ve navenda nakokiyên serweriyê ye. Li herêma ku ji sala 1989’an û vir ve di bin kontrola Hindistanê de ye serhildaneke serxwebûnê dewam dike ku heta niha bi deh hezaran kesî jiyana xwe ji dest dan. Delhî ya Nû li herêmê 500 hezar leşkerên xwe bi cih kiriye. Pahalgam a ku êrîş lê hate kirin jî bi 90 kîlometreyî dûrî Srînagarê ye. Hikumeta Narendra Modî sala 2019’an statuya xweser a Keşmîrê betal kiribû.
