Bîlançoya li Silêmaniyeyê ya ji bo girtina Lahûr Şêx Cengî hate meşandin giran bû.
Li gorî rayedarên xwecihî, di şer de 3 endamên hêzên ewlekariyê jiyana xwe ji dest dan, zêdeyî 10 kes jî birîndar bûn.
Çavkaniyekî ewlekariyê jî ji AFP’ê re axivî û diyar kir ku ji yekîneya operasyonên taybet a Asayîşê kesek, ji yekîneya têkoşîna li dijî terorê kesek û ji hêzên komando jî kesekî jiyana xwe ji dest da. Rayedarekî din ê ewlekariyê jî diyar kir ku 19 kes birîndar bûn.
Heta niha tu daxuyaniyeke fermî têkildarî bê ka di pevçûnan de ji hêzên Lahûr Şêx Cengî kesek jiyana xwe ji dest dane yan ne, nehatiye kirin.
Êvara 21’ê Tebaxê hêzên ewlekariyê yên Silêmaniyeyê dor li Otela Lalezar pêçandibûn ku lîderê Berey Gel Lahûr Şêx Cengî lê bû.
Sibeha Înê jî saet di 03:00 de li Lalezarê şer destpê kiribû û piştre droneyek li Debaşanê hatibû xistin.
Hate diyarkirin ku piştî pevçûnan heta niha birayên wî Polad Şêx Cengî û Aso Şêx Cengî, xwişkek wî, zawayê wî, sê zarokên wî û hevjina wî hatiye binçavkirin.
Li gorî hin agahiyan, hêzên ewlehiyê serokê Eniya Gel û birayê wî Polad birine Debaşanê.
Li gorî agahiyên hatine wergirtin, tê plankirin ku malbat û zarokên wî ji Swêdê re û xwişk û zawayê wan jî ji Ingilîstanê re bên şandin.
Lahur Şêx Cengî li gorî xala 56’an a Qanûna Cezayê ya Iraqê bi “gefkirina li ewlehiyê û xirakirina aramiyê” tê sûcdarkirin. Çavkaniyên YNK’ê jî wî bi hewldana darbeyê û xirakirina ewlehiya Silêmaniyeyê sûcdar dikin.
Bi darizandina wî re dibe ku heta 7 salan cezayê girtîgehê bigire.
