Li Wargeha Penaberan a Şehîd Rustem Cûdî (Mexmûr) Şehîdên Ked û Demokrasiyê Mamoste Seîd Çomlek ku di 13’ê Tebaxê de û Kerem Tonka ku 4’ê Îlonê de bi qirîza dil jiyana xwe ji dest dabûn, hatin bîranîn.
Bîranîn li Komîteya Malbatên Şehîdan a wargehê, bi tevlîbûna sedan welatiyan û bi deqeyek rêzgirtin destpê kir.
Piştî rêzgirtinê sicîla şehîdan hate xwendin û di pey wê de li ser navê Komîteya Têkiliyên Ji Derve û hevrêyê şehîd Seîd, Mehmûd Zêwgî axivî û di serî de sersaxî ji malbat gelê wargehê re xwest.
Mehmûd Zêwgî wiha axaftina xwe domand: “Em îro herdu hevrêyên xwe bi bîr tînin. Keda her du hevalên me jî ti caran nayê ji bîrkirin. Xebata wan ji bo Kurdîniyê kir wê ti carî neyê windakirin. Hevalê Kerem bi salên dirêj di şaredariyê de kar kir û xizmeta gelê xwe kir. Di demên herî zehmet de pêşengtî kir. Mamoste Seîd jî endamê komîteya me bû. Em ji nêz ve nas dikin, ti caran em keda wê ji bîrnakin. Mamoste bû û bi hezaran xwendevanên wargehê bi saya wê xwendiye. Bi saya keda Mamoste Seîd bi hezaran zarokên wargehê zimanê Kurdî xwendiye. Têkoşîna Mamoste Seîd hîn beriya PKK’ê hebû. Di contaya 12’ê Îlonê de ket zindanan, bi Şehîd Mehmed Karasungur re karkiriye. Em ti caran zehmetiyên ku dîtî ji bîr nakin. Malbatek fedekar û welatparêz bû. Hertim mînak bû ji bo me. Bila ruhê wan şad be.”
Piştî wê Hevşaredarê wargehê Cûma Bilehî axivî û wî jî sersaxî ji Rêber Apo û malbatê re xwest û wiha qala keda şehîdan kir: “Em wek Şaredarî pir xemgînin ku şahadetek wiha çêbû. Ji bo me giran bû. Ji ber ku Şehîd Kerem zanayek yê Şaredariyê bû. Hertim rê nîşanî me dida û bi salên dirêj xizmet kiriye. Di demên ku êriş ser wargehê çêdibû de kesê herî zêde xizmet dikir û bi tangan av dibir cihê bûyerê Mam Kerem bû. Em wî bi rêz û minetdarî bibîrtînin. Mamoste Seîd jî xwedî kesayetiyek bi nirx û hêja bû. Mamostayê wargehê bû. Zarokên me li ber destê wê xwendin. Herdu şehîdên me jî hêjayê her tiştîbûn. Emê heta dawî xwedî li keda wan derbikevin. Wê neyên ji bîrkirin.”
Li ser navê Malbata Şehîd Kerem, hevjîna wê Fatma Tonka axivî û wiha hestên xwe anîn ser ziman: “Em di serî de hemû şehîdên Kurdistanê bi rêz û minetdarî bibîrtînin. Em gelek spasiya xelkê xwe yê wargehê dikin. Em nehêlan tenê, xema me parvekirin. Bila serê we saxbe. Şehîd Kerem hertim ji bo doza Kurdî karkiriye. Em jî ji ber sîstema cerdevantiyê ji warên xwe hatine koçberkirin û me berê xwe da metrepolan. Li wir jî destê xwe ji me nekişandin û em derbasî wargehê bûn. Hertim keda me ji bo doza Kurd hebû. Ji ber wê me gelek bedal dane. Emê xwedî li keda Şehîd Kerem derbikevin. Şehîd Kerem li vêderê bi salên dirêj di Şaredariyê de xizmet kir. Em hertim bi şehîdê xwe serbilindin. Bila serê Rêber Apo û gerîlayên me saxbe.”
Li ser navê Malbata Şehîd Mamoste Seîd, hevjîna wê Yildiz Çomlek axivî û wiha qala ked û têkoşîna Şehîd Seîd kir: “Em wek malbat minetdarê gelê xwe ne. Xem ji me re nehiştin. Em jî dibêjin bila serê Rêber Apo saxbe, bila serê gerîlayên me saxbe. Rastî şahadet ji bo me giran hat. Wargeh jî ket bin vê bandorê. Em wek malbat heta dawî şopdarên şehîdên xwe ne. Mamoste Seîd ji bo zarokan zarok bû, ji mezinan re jî mezin bû. Gelek dilnizim bû. Hertim dixwest perwerde bide. Ti caran navber nedaye karê xwe. Hertim fikir û mejiyê wî li ser kar bû. Em wek malbat bi şehîdê xwe serbilindin. Me gelek êş û azar kêşaye, emê xwedî li wan kedan derbikevin. Bila serê Rêber Apo û hevalên wî saxbe.”
Her wiha peyamek sersaxiyê ku ji Komîteya Dîplomasiya KCK’ê hatibû şandibû hate xwendin û herî dawî Hevberdevka Komîteya Malbatên Şehîdan Sarya Marînos sersaxî ji Rêber Apo, gerîlayên serê çiya û malbatên şehîdan re xwest û bernameya bîranînê bi diruşmeyên ‘Şehîd Namirin’ û ‘Bijî Serok Apo’ bi dawî bû.
