Di pêvajoya ku li gel desteserkirina Rêxistina Bajêr a Stenbolê ya Partiya Gel a Komarê (CHP) dest pê kir de şeva 7’ê Îlonê rêyên bînaya bajêr a CHP’ê û bînaya kar hatin dorpêçkirin û li hemberî nobeda CHP’yîyan a li dijî desteserkirinê êrîş pêk hatin.
Li gel ku tê payîn ku qeyûmê ji CHP’ê re hatiye tayînkirin, di nava rojê de were bînaya bajêr, nobeda CHP’yî û welatiyên piştgiriyê didin a li nêzî bînayê berdewam dike. Ji bilî parlamenteran polîs destûrê nadin derbasbûna tu kesî.
Parlamenterê Stenbolê yê DEM Partiyê Celal Firat saetên sibehê ji bo piştevaniyê çû bînaya bajêr a CHP’ê û rûdan û rewşa li wir ji ANF’ê re nirxand.
Firat di destpêka axaftina xwe de da zanîn ku tişta tê kirin li hemberî îradeya gel deryek e û ev yek anîn ziman:
‘’Biryara darazê ya têkildarî Serokatiya Bajêr a Stenbolê ya CHP’ê û piştre dorpêçkirina bînayê û tayînkirina qeyûm, li hemberî îradaya gel derbeyeke eşkere ye. Ji şeva 7’ê Îlonê ve ye li wê şevê biryara desteserkirinê hate standin, em jî ji bo mezinkirina piştevaniyê di çalakiya nobeda edaletê ya li pêşiya bînaya bajêr a CHP’ê de cih digirin. Bîna bi mantiqa qeyûm hatiye dorpêçkirin. Ev bêqanûnî bes ne êrîşeke li dijî pêşeroja partiyekê ye pêşeroja hemû pergala demokratîk hedef digire. Anîna rêveberên bi rêya tayînkirinê ya li şûna nûnerên ji aliyê gel ve hatine hilbijartin tê wateya tunehesibandina tercîhên siyasî. Ev tişta ku îro li CHP’ê hatiye kirin, beriya niha gelek caran li DEM Partî û serokên şaredariyan ên ji aliyê gel ve hatibûn hilbijartin hate kirin, îrade hate xespkirin û gotina gel tune hate hesibandin. Bêhiqûqiya ku duh li şaredariyan hate kirin û ya îro li partiyên siyasî tê kirin, rewşa xeternak a demokrasiya Tirkiyeyê nîşan dide.’’
BES NE BÊDENGKIRIN, TASFIYEKIRINA HEMÛ DESTKEFTIYAN ARMANC DIKE
Celal Firat da zanîn ku polîtîkayên desteserkirinê veguherîne rewşeke sîstematîk, diyar kir ku desthilatdarî peyama; ‘’dibe ku dor were her kesî’’ dide û ev yek anîn ziman:
‘’Polîtîkayên desteserkirinê, veguherî feraseteke rêveberiyê ya sîstematîk a îradeya beşên civakî yên cuda hedef digirin. Qeyûmên ku ji şaredariyên me re hatin tayînkirin, nirxên gel ên ku bi salan bi keda xwe ava kirin, talan kirin, çavkaniyên gel tune kirin û demokrasiya xwecihî ji holê rakirin. Rewşa ku îro rû daye, bes ne li hemberî partiyeke siyasî, li hemberî hemû demokrasiyê gefeke eşkere ye.’’
DIVÊ TAVILÊ DEV JÊ BERDIN
Celal Firat di dawiya axaftina xwe de da zanîn ku DEM Partî li hemberî desteserkirinê ye û got: ‘’Em weke DEM Partî bi salan e tînin ziman ku tayînkirina qeyûman, îradeya gelên me xesp dikin, nirxên demokratîk tune dikinû zirarê didin aşitiyê. Tişta ku îro li CHP’ê têkirin xelekeke nû ya vê zincîrê ye. Demokrasî bes bi qebûlkirina cudahî, pirdengî û îradeya gel pêkan e. Ji bervê yekê banga me eşkere ye: Divê tavilê dev ji polîtîkayên desteserkirinê berdin, rêzê li îradeya gel û nirxên demokratîk bigirin û serweriya hiqûqê were esasgirtin. Çimkî îradeya gel nayê bêdengkirin û dengê demokrasiyê bi rêya qeyûman nayê qutkirin.’’
