Di ser banga 27’ê Sibatê ya Rêber Apo û biryara PKK’ê ya ragihandina agirbestê re mehek derbas bû, lê hîn jî hikumetê gaveke şênber neavêtiye. Li ailyê din li Îmraliyê di şert û mercên Rêber Apo de jî guhertinek nehatiye kirin.
Ji Zanîngeha Akdenîzê Prof. Dr. Cengîz Aktar hem bûyerên li Sûriyeyê hem jî nîqaşên li ser diyalog û pêvajoya li Tirkiyeyê ji ANF’ê re nirxand.
Cengîz Aktar anî ziman ku li gel hemû bûyerên neyînî yên li Sûriyeyê gelekî girîng e ku rewş veneguheriye şerekî navxweyî û bi bîr xist ku daxuyaniyên rêveberiya Şamê ji aliyê Durzî û Kurdan ve nayê qebûlkirin. Aktar bûyerên heyî weke ‘atmosfereke kaosê’ pênase kir û diyar kir ku Tirkiye dixwaze li herêmê qereqolan ava bike, lê belê Îsraîl a ku hêzê ji Emerîkayê werdigire li ber vê projeyê radibe. Aktar destnîşan kir ku Îsraîl naxwaze Tirkiye li Sûriyeyê mayinde be û got, hîn ê nayê zanîn bê kî wê li ser rêveberiya AHmed El Şara bi bandor be.
‘DESTHILATDARÎ ÎRADEYEKE SIYASÎ NÎŞAN NADE’
Aktar anî ziman ku bûyerên li Sûriyeyê diqewimin pêwendiya xwe bi nîqaşên pêvajoya li Tirkiyeyê re heye, gotina ‘jê re nebêjin pêvajo’ ya aliyê desthilatdariyê bi bîr xist û diyar kir ku desthilatdarî xwedî projeyekê nîne. Aktar işaret bi daxuyaniyên Hevseroka Konseya Rêveber a KCK’ê Besê Hozat kir ku li ser nîqaşan axivî bû û got, “Desthilatdarî dibêje, ez ê tiştekî nedim. Ji xwe tiştekî nade. Qendîl zane bê ev çi ye. Daxuyaniya dawî ya Besê Hozat gelekî şênber û zelal bû.” Aktar destnîşan kir ku desthilatdarî îradeyeke siyasî ji bo bersivdayina li daxwazên Kkurdan nîşan nade.
‘DESTHILATDARÎ NIZANE BÊ DIXWAZE ÇI BIKE’
Aktar bal kişand ser girtina Şaredarê Bajarê Mezin ê Stenbolê Ekrem Îmamoglû û diyar kir ku desthilatdarî bi vê gavê re nizane bê dixwaze çi bike, serê desthilatdariyê tevlîhev e. Aktar ggot, “Rejîmên bi vî rengî yên otorîter û ne zelal, hin biryaran werdigirin. Şîrovekirina vê yekê jî dibe para me. Ne bawer im, yanî bi guman im ku zanibin bê dixwazin çi bikin.” Aktar destnîşan kir ku bûyerên li Stenbolê diqewimin jî tevlîheviyek e.
‘ERDOGAN Û BAHÇELÎ QEDERA XWE KIRIN YEK’
Akdar daxuyaniyên dawî yên Devlet Bahçelî jî şîrove kir û anî ziman ku ew ne bawer e di nava desthilatdariyê de di navbera Devlet Bahçelî û Tayyîp Erdogan de pirsgirêk hebe. Aktar ragihand ku Erdogan û Bahçelî qedera xwe kirine yek û got, ne bawer e ku desthilatdariya heyî bixwaze bi hilbijartinê dest ji desthilatdariyê berde. Aktar bi vî rengî dewam kir, “Ji xwe nepêkan e ku dest jê berdin. Ji ber ku şebekeyeke sûc e. Karekî li derveyî qanûnê nemaye ku van di nava 20 salan de bi taybetî jî ji sala 2013’an û vir ve nekirine. Dema ku ji desthilatdariyê ketin, êvarê wê yekser bêne ggirtin. Ji ber ku destûra bingehîn û hemû qanûn têk birin. Ya ku dizî ne li aliyekî.”
‘DESTHILATDARÎ DIVÊ GAVÊ BIAVÊJE’
Aktar destnîşan kir ku di halê hazir de divê desthilatdarî gavê biavêje û got, “Desthilatdarî gavê neavêje, ji ber ku dest û milê wî girêdayî ye. Ji xwe got, ku wê neke. Dibêje ‘Tirkiyeyeke bê teror’, bangeke welê dike ku ne diyar e bê çi ye. Ji bo PKK kongreya xwe li Mûşê bicivîne bang kir. Bi dîtina min rewşeke kêrnehatî ya gelekî mezin heye.”
‘EM NIKARIN QALA MUXALEFETEKE TOPYEKÛN BIKIN’
Li ser helwest û karên ku divê muxalefet jî bike Cengîz Aktar got, “Di mîtîng û çalakiyên ji bo Îmamoglû de dijminatiya li Kurdan heye. Hemû nebe jî beşek bi rengekî eşkere dijminatiyê li Kurdan dike. Yanî mirov li Tirkiyeyê nikare qala muxalefeteke topyekûn bike.” Aktar diyar kir ku kodên hebûnê yên desthilatdariyê antî demokratîk in û destnîşan kir ku rejîmeke bi vî rengî nikare li ser bingeha demokrasî û mafên mirovan gavê biavêje.
