Hevseroka Kongreya Civaka Demokratîk (KCD) Leyla Guven jî di nav de li 12 jinên li Girtîgeha Jinan a Sîncanê tên ragirtin, bi sedema protestokirina komploya navneteweyî ya 15’ê Sibatê ya li dijî Rêber Apo, cezayê disiplînê hate birîn. Komplo, bi dirûşman hate protestokirin. Piştî çalakiyê, Lijneya Disiplînê ya Girtîgehê civiya û li Leyla Guven, Zelal Bîlgîn, Elîf Çetînbaş, Melîke Goksu, Saadet Akin, Selver Yildirim, Ozlem Demîr, Emîna Abîş, Rihan Kavak Ozbek û Zeliha Ustabaşê cezayên bêparhiştina ji agahîstendin û ragihandinê hate birîn. Li Fatma Aslan û Sevîm Ekînê jî ji bo 2 mehan cezayê qedexeya hevdîtina bi ziyaretvanan re hate dayin.
Girtiyan, li dijî biryara di 7’ê Adarê de hatibû dayin, li 2’yemîn Dadgeriya Înfazê ya Bati ya Enqereyê îtîraz kirin. Dadgeriyê ev serlêdan di 25’ê Hezîranê de red kir. Dadgeriyê, di hinceta biryara xwe de got: “Heta peywirdarên fermî girtekeke nû ku berevajiya rewşa heyî vedibêje amade dikin dê derbasdar be.”
Piştî redkirina îtîrazê, parêzeran serî li 1’emîn Dadgeha Cezayên Giran a Bati ya Enqereyê dan. Dadgehê, di 25’ê Tîrmehê de bi heman sedemê îtîraz red kir.
MAFÊN WAN TÊN BINPÊKIRIN
Wekîla DEM Partiyê ya Rihayê Dîlan Kunt Ayan ji ber vê mijarê serî li Komîsyona Lêkolînkirina Mafên Mirovan a Meclisê (ÎHÎK) da. Dîlan Kunt Ayanê got ku girtek ji hêla tenê yek gardiyanê ve hatiye amadekirin û biryar li gorî vê girtekê hatiye dayin. Dîlan Kunt Ayanê, diyar kir ku qeydên kamerayê nehatine lêkolînkirin, serî li îfadeyên şahidan nehatiye dayin, biryara hatiye dayin li dijî peymanên navneteweyî ye û bi vê yekê re mafên azadiya xweîfadekirin û ewlehiyê ya girtiyan hatiye binpêkirin.
DAXWAZA LÊKOLÎN LI GIRTÎGEHÊ
Dîlan Kunt Ayanê xwest ku ÎHÎK li Girtîgeha Jinan a Sîncanê têkildarî cezayên disiplînê lêkolînê bike û ji bo parastina mafên girtiyan û jiholêrakirina binpêkirinên heyî bikeve dewrê. Her wiha hat xwestin ku ÎHÎK biçe girtîgehê û lêkolînê bike û cezayên disiplînê yên derhiqûqî bên betalkirin.
