Ciwanê Kurd Mehrab Abdulahzade ku li Îranê di dema çalakiyên şermezarkirinê yên dawî de hatibû binçavkirin, hate darvekirin.
Ajansa Nûçeyan a Mîzanê ku ser bi dadgeriya Îranê ve ye, ragihand ku Abdullahzade li Girtîgeha Ûrmiyeyê vê sibehê hate darvekirin.
Abdullahzade li Ûrmiyeyê di xwepêşandanên şermezarkirinê de hatibû binçavkirin, piştre bi îdîaya “xerakariya li ser rûyê erdê” û “kuştina endamekî Besîcê” hatibû darizandin.
Biryara darvekirinê ya ku ji aliyê Şaxê 2’yemîn a Dadgeha Şoreşê ya Ûrmiyeyê ve hate dayin, ji aliyê Şaxê 9’emîn a Dadgeha Bilind ve hate pejirandin. Hate ragihandin ku înfaz bêyî agahdarkirina malbatê hate kirin.
DELÎL NÎNE, ÊŞKENCE HEYE
Di raporên rêxistinên mafên mirovan de tê gotin, Abdullahzade di binê çavan de ji bo bi zorê li xwe mikur bê êşkenceya fîzîkî û psîkolojîk a giran lê hatiye kirin.
Her wiha hate ragihandin ku di dîmenên kameraya ewlekariyê ya li cihê bûyerê de ku kuştina endamê Besîcê nîşan dide, Abdullahzade li qadê nîne.
