Gelê Kurd 4’ê Nîsanê roja Rojbûna Rêberê Gelê Kurd Abdullah Ocalan Apo weke rojbûna xwe pênase dikin. Ji ber ku bi dayîkbûna Abdullah Ocalan re Kurdan êdî xwe nas kir û ji bo wê her sal vê rojê bi coş û kelecanek mezin pîroz dikin. Têkildarî roja 4’ê Nîsanê ango Rojbûna Rêberê Gelê Kurd Abdullah Ocalan, Ciwanên Wargeha Penaberan a Şehîd Rustem Cûdî (Mexmûr) ji ANF’ê re axivîn û bang li tevahî gelê Kurd û gelên cîhanê kirin ku îsal bikin sala azadiya fîzîkî ya Abdullah Ocalan.
‘FIKIR Û FELSEFEYA RÊBER APO LI KURDISTAN Û CÎHANÊ JIYANÎ BÛYE’
Ciwana bi navê Zêrîn Nêrwehî di destpêka axaftina xwe de 4’ê Nîsanê li Rêberê Gelê Kurd Abdullah Ocalan û tevahî gelê Kurd ê azadîxwaz pîroz kir û wiha peyîvî: “Beriya ku Rêber Apo derbikeve, Kurdistan di rewşa çar parçeyan de bû û zext û zordariyek mezin li ser gelê Kurd hebû. Bi derketina Rêbertî re êdî gelê Kurd di nava cîhanê de hat naskirin. Rêber Apo bi felsefe û îdeolojiya xwe ji bo azadiya Kurd û Kurdistanê têkoşînekî bê hempa li dijî hemû desthilatdaran da destpêkirin. Rêber Apo ne tenê ji bo gelê Kurd, ji bo gelên li cîhanê jî bûye Rêber. Ji ber vê felsefe û îdeolojiya xwe ya heyî, Rêber Apo li Îmraliyê tê ragirtin. Her çiqas Rêber Apo li Îmraliyê girtî be jî, lê fikir û felsefeya Rêber Apo li Kurdistan û cîhanê jiyanî bûye. Ez bang li tevahî gelê Kurd û gelên cîhanê dikim ku îsal bikin sala azadiya fîzîkî ya Rêber Apo.”
‘BI SAYA RÊBER APO KURD BI ÇAND Û NETEWA XWE HESIYA’
Ciwanê binavê Serkan Bîlen jî rojbûna Rêberê Gelê Kurd Abdullah Ocalan pîroz kir û wiha got: “Beriya ku Rêbertî derbikeve, gelê Kurd ji aliyê deshilatdaran ve ji Kurdbûna wan, çand û zimanê wan hatibûn dûrxistin û dixwestin bi zimanê xwe wan bi rêve bibin. Piştî derketina Rêber Apo ev yek dîsa li rastiya xwe vegeriya ango Kurd bi Kurdbûna xwe, çand û netewa xwe ve hîn zêdetir hatin girêdan. Bi saya Rêber Apo Kurd heta vê astê hatine.”
Serkan Bîlen di dawiya axaftinên xwe de ev bang kir: “Banga min ji bo hemû gelê Kurd ewe ku çalakiyên xwe hîn xurtir bikin ku îsal bikin sala azadiya fîzîkî ya Rêber Apo.”
