Fermandariya Yekîneyên Berxwedana Şengalê (YBŞ) bi daxuyaniyekê ragihand ku hevrêyê wan Emîn Qartal bi nasnav Kawa Şengalî di 15’ê Gulana 2026’an de şehîd bûye.
Di destpêka daxuyaniyê de hate gotin, “Em bi dilgiranî û xemgîniyeke kûr ji gelê xwe re radigihînin ku hevrê Kawa Şengalî piştî têkoşîneke bi rûmet a ji bo parastina ax, gel û nirxên azadiyê, di encama bûyereke trajîk de jiyana xwe ji dest da.
Fermandariya YBŞ’ê sersaxî û hevxemiya xwe ji malbata fermandar Kawa Şengalî, heval û hezkiriyên wî re ragihand û got, Bila serê Rêber Apo, serê gelê me sax be.”
Di daxuyaniyê de hate gotin, “Heval Kawa yek ji zarokên Şengalê bû ku barê gelê xwe hilgirt û bi wêrekî li dijî çeteyên DAIŞ’ê sekinî. Ew beşdarî gelek operasyonên leşkerî bû û di beşên geş ên berxwedana gelê me de amade bû. Beşdarî şerên rizgariyê û parastina ax û rûmeta gelê xwe bû. Hebûna wî ne tenê bi qadên şer ve sînordar bû, lê di heman demê de di pabendbûna wî ya kûr a bi berpirsiyariyên ku jê re hatibûn spartin de jî diyar bû. Ji ber ku wî bi dîsîplîn û fedakariyeke herî zêde erkên cûrbecûr pêk dianîn.”
Fermandariyê ragihand ku Kawa Şengalî bi dilnizmî û hevaltiya xwe ya komînal dihate naskirin, bêdudilî û bêwestandin xizmet ji heval û gelê xwe re dikir û got, “Ew yek ji wan kesan bû, ku berî ku li qadên şer şopa xwe bihêle, wî şopa xwe di dilên her kesî ew nas dikir de dihêla û ji ber vê yekê hebûna wî wê di bîra ewan kesan de zindî bimîne.”
YBŞ’ê diyar kir ku koça dawî ya fermandar Kawa Şengalî windahiyeke êşdar e, lê wî mînakeke geş a fedakarî û comerdî li pey xwe hişt.
Daxuyanî bi vî rengî bi dawî bû:
“Em bi rêzdarî li ber bîranîna wî bejna xwe ditewînin û em bi serbilindî qurbaniyên ku wî ji bo gelê xwe û doza xwe kirine bi bîr tînin. Û em teqez dikin ku em ê xeyal û armancê wî pêk bînin û diyarî wî û hemû cangoriyên xwe yên hêja bikin.”
