Tîma Kurdistana Iraqê ya Rêxistina CPT, rapora daneyên êrîşên sê mehên dawî yên rejîma Îranê yên li ser Herêma Kurdistanê belav kir.
Di rapora rêxistinê de hatiye diyarkirin ku piştî destpêkirina şerê di navbera Dewletên Yekbûyî yên Amerîkayê (DYE), Îsraîl û Komara Îslamî ya Îranê ya di 28’ê Sibata 2026’an de, Herêma Kurdistanê rûbirûyî êrîşên Pasdarên Îranê û komên çekdar ên hevalbendên wê yên li Iraqê bûye.
Li gorî raporê, di navbera van sê mehan de 751 êrîş hatine qeydkirin. Li gorî raporê di encama van êrîşan de 22 kesan jiyana xwe ji dest dane û 112 kesên din jî birîndar bûne.
Rêxistina CPT’yê daneyên êrîşên Îranê yên di dema sê mehên şer de (28’ê Sibatê – 28’ê Gulanê) bi vî awayî pêşkêş kiriye:
Hêjmara giştî ya êrîşan: 751 êrîş (647 êrîş di 40 rojên pêşî de û beriya agirbesta 8’ê Nîsanê pêk hatine). Aliyên ku êrîş kirine: Komên hevalbendên Îranê yên li Iraqê berpirsê (%60.3) êrîşanin û hêzên Îranê bixwe jî berpirsê %39.7 êrîşên li ser Herêma Kurdistanê ne.
Cureya êrîşan: Ji sedî %78.4 ya tevahiya êrîşan ji aliyê balafirên bêfirovan (drone) yên xwekuj ve hatine kirin. Qada êrîşan: Sînorê parêzgeha Hewlêrê her dem armanca sereke ya êrîşan bûye û ji sedî %78.3 ya tevahiya êrîşan li ser sînorê vî parêzgehê pêk hatine.
Cihên ku hatine armancgirtin: Ji sedî %37.4 ya êrîşan li ser sazî û navendên dîplomatîk û leşkerî yên Amerîkayê yên li Herêma Kurdistanê bûn. Ji sedî %31.7 ya êrîşên din li ser cihên sivîl, kompanya, baregehên Wezareta Pêşmerge û navendên leşkerî yên ku beşdarî wî şerî nebûne, hatine kirin. Her wiha ji sedî %30.9 ya êrîşan jî li ser kampên penaberan û baregehên partiyên Kurdî yên Rojhilatê Kurdistanê bûne.
Tevî ragihandina agirbestê ya di 8’ê Nîsanê de, êrîşên li ser Herêma Kurdistanê nehatin sekinandin. Tîma Kurdistana Iraqê ya CPT’yê, di dema agirbestê de 104 êrîşên li ser Herêma Kurdistanê qeyd kirine.
Hedef guherîn: Ji sedî %82.7 ya êrîşên di dema agirbestê de, li ser partiyên Kurdî yên Rojhilatê Kurdistanê û kampên wan bûn. Guhertina aliyê ku êrîş kiriye: Di dema agirbestê de hêzên Îranê bûn aliyê sereke yê encamdana êrîşan û berpirsê nêzîkî %89 ya êrîşên vê demê ne.
Qurbanî: Tevahiya qurbaniyên dema agirbestê ku 5 kuştî û 17 birîndarin û endamên partiyên Kurdî yên Rojhilatê Kurdistanê ne.
Ji bo hemû aliyan: Gihîştina bi peymaneke mecbûrî ku sekinandina tam a êrîşên li ser xaka Herêma Kurdistanê mîsoger bike.
Ji bo Hikûmeta Iraqê: Parastina serweriya xaka Iraqê, lêpirsîn û dadgehkirina Komara Îslamî ya Îranê û komên hevalbendên Îranê yên li Iraqê.
Ji bo Hikûmeta Herêma Kurdistanê û Hikûmeta Iraqê: Dabînkirina qerebûya bilez ji bo wan welatiyên ku ziyan dîtine, li gorî qanûna jimare 20 ya sala 2009’an û qanûna sererastkirî ya jimare 57 ya sala 2015’an.
