Di roja 3’yemîn a Festivala Munzurê de, panela “Li Tirkiyeyê Pêvajoya Siyasî, Rojhilata Navîn û Hegemonyaya Emperyalîst” hate lidarxistin. Ozkar Tacer moderatoriya panelê kir û Cîgirê Hevserokên Giştî yên DEM Partiyê Mahfuz Guleryuz, Parlementerê CHP’ê Gokhan Gunaydin û nûnerê Federasyona Meclîsên Sosyalîst (SMF) Ziya Cebecî wekî axaftvan tevlî bbûn.
Di panelê de ewil Mahfuz Guleryuz axivî. Guleryuz diyar kir ku perspektîfa Rêber Apo, demokratîkbûna Komarê û jiyana hevpar a nasnameyên cuda bi awayekî hevpar hedef dike.
Guleryuz anî ziman ku ew ê ji bo serkeftina pêvajoya aştiyê têkoşînê bidomînin û anî ziman ku demokratîkbûn û aştî bi hev re peş ve biçin. Guleryuz bal kişand ser xebatên komîsyona ku li Meclîsê hatiye avakirin û diyar kir ku rapora ku hatiye amadekirin kêm e û banga avêtina gavên pêwîst kir.
Piştre Parlementerê CHP’ê Gokhan Gunaydin axivî. Ginaydin diyar kir ku di çareseriya pirsgirêka demokrasiyê ya li Tirkiyeyê de, meseleya Kurd û ya Elewî sernavên girîng in û wiha got, “Divê meseleya Kurd were çareserkirin û bingeha hemwelatîbûna wekhev ava bikin.”
Nûnerê Federasyona Meclîsên Sosyalîst (SMF) Ziya Cebecî jî parast ku Tirkiye bi salên dirêj in bi têgihiştina rêveberiya otorîter tê rêvebirin.
Cebecî pêkanînên qeyûm, binçavkirin û girtinan rexne kir û got ku divê îradeya demokratîk were naskirin.
Panel piştî beşa pirs-bersiv bi dawî bû.
MEŞA LI DIJÎ TALANA XWEZAYÊ
Piştî panelê li dijî talana xwezaya Dersimê meş hate lidarxistin. Girseya ku li Kolana Hunerê li hev civiyan, pankarta, “Em ê Dersimê radestî şîrketên madenê nekin” vkeirin û heta qada Seyîd Riza meşiyan.
Di meşa ku def û zirne hatin xistin de, dirûşmeyên, “Dest nede Munzurê min, xaka min û xwezaya min”, “Dersim rûmet e, xwedî li rûmeta xwe derkeve” û “Em li Dersimê madenê naxwazin” hatin berzkirin. Piştî meşê li qadê axaftin hatin kirin. Di axaftinê de îşaret bi qiririna erdnîgariya Dersimê hat kirin û banga têkoşînê li dijî hilweşîna ku şîrketên madenê li Dersimê dikin hat kirin.
