Li Herêma Bakur û Rojhilatê Sûriyeyê ji 15 heya 21’ê Mijdarê li Dêrazor, Tebqa û Reqayê êrîşên curbicur ên hêzên hikumeta veguhêz a Sûriyeyê û şaneyên çeteyên DAÎŞ’ê yên li dijî sivîlan û hêzên parastinê pêk hatin. Li hemberî êrîşan Hêzên Sûriya Demokratîk (QSD) û Hêzên Ewlekariya Hundirîn ji bo parastina herêmê serferber bûn.
Êrîşên ku ji aliyê ajansa ANHA ve me ve hatine tomarkirin, wiha ne:
15’ê Mijdarê, hêzên hikumeta veguhêz a Sûriyeyê bi dronên xwekuj û çekên giran êrîşî nuqteyên QSD’ê yên li eniya gundê Xanim El Elî yê li rojhilatê Reqayê kir, di encamê de 3 şervan birîndar bû. Dûre QSD’ê bi daxuyaniyekê ragihandibû ku êrîş têk biriye û êrîşkar birîndar bûne.
Di heman rojê de kesên li ser motorsiklêtê siwar bûbûn, diruşmên DAÎŞ’ê diavêtin û sembolan wan rakiribûn, li bajarokê Baxozê erebeya hevserokê Şaredariya Baxozê Ehmed Nafii gulebaran kir, di encamê de zirarên madî çêbûn.
16’ê Mijdarê, dema endamekî Hêzên Ewlekariya Hundirîn vedigerî mala xwe li ser rêya lez a li bajarokê Mihêmîdiyê yê rojavayê kantona Dêrazorê ji hêla çekdaran ve hatibû gulebarankirin û di cih de şehîd bû.
18’ê Mijdarê, kesên nenas Komeleya Perwerdê ya bajarokê Xeranîc ê rojhilatê kantona Dêrazorê şewitandibû û di encamê de zirarên madî çêbûn. Ev bûyer piştî çend hefteyan ji şewitandina avahiya Kombûna Jinan a Zenûbiya ya bajarokê Ebû Hemam a li heman gundewarî û nivîsandina gotinên girêdayî çeteyên DAÎŞ’ê, pêk hat.
19’ê Mijdarê, QSD’ê 2 dronên çeteyên DAÎŞ’ê ku ji nuqteyên girêdayî hêzên hikumeta veguhêz ên li eniya gundê Xanim El Elî yê gundewarê rojhilatê Reqayê derketibûn, xistibûn xwarê. QSD’ê bi dîmen aşkera kiribû hin koman ji bo hêsankirina êrîşa DAÎŞ’ê destek dabû. QSD’ê bi şev bersiv da cihê derketina wan dronan li gundewarê başûr û rojhilat ê Reqayê.
20’ê Mijdarê, bi çekên giran pevçûnên li heman eniyê dewam kirin. Hêzên hikumeta veguhêz rêya di navbera Reqa û Dêrazorê de ya li nêzî bajarokên El Bohemed û El Xanim El Elî yên rojhilatê kantona Reqayê de girtibûn û li ser benda kontrolê ya Reqa-Meidan bi dehan ciwanên di hundirê basên ji Bakur û Rojhilatê Sûriyeyê ber bi Dêrazor û herêmên hundirê Sûriyeyê ve diçûn, girtin.
Di heman rojê de, çeteyên “Firqeya 80’an” ên girêdayî hikumeta veguhêz bi çekên sivik û navîn êrîşî xelkê gundê Cib Ebyed ê bakurê bajarê Dêr Hafirê yê gundewarê kantona Tebqayê kiribû, sivîl birîndar bûbûn. Ew êrîş, piştî 2 rojan ji qetilkirina Ebdullah El Mûsa yê ji heman gundê pêk hatibû.
Di heman rojê de, Hêzên Ewlekariya Hundirîn şaneyeke DAÎŞ’ê ya ji 2 kesan pêk tê yên ji Hesekê bê bandor kiribû. Hêzan ragihandibû ku wan her du çeteyan li xwe mikur hatibûn ku bi çavdêriya serkirdeyan li Şamê û Serêkaniyê li dijî QSD’ê û Ewlekariya Hundirîn êrîş pêk anîne, çekdî, pere û kordînat dane wan.
21’ê Mijdarê, şaneyên DAÎŞ’ê li bajarokên Ebrîha û Zîban ên gundewarê rojhilatê Dêrazorê bi gule û bombeyan êrîşî nuqteyên ewlehiyê yên Hêzên Ewlekariya Hundirîn kiribûn, lê tu kes birîndar nebûbûn. Hêzan bersiva jêderên êrîşan dabûn û dewriyeyên şopandina êrîşkaran pêk anînbûn.
Ev êrîşên metirsiyên firehbûna xeleka rageşiyê li herêmê çêdikin, lê QSD’ê û Hêzên Ewlekariya Hundirîn diyar dikin ku ji bo parastina şêniyan û misogerkirina aramiya herêmê amade ne rûbirûyî van gefan bisekinin.
