Pîrozbahiya Newrozê ya li Mûşê bi dirûşmên; ‘Rêbertiya Azad Civaka Demokratîk’ û ‘Civaka Demokratîk ji bo Azadiyê’ pêk hat. Qada Îstasyonê bi alên DEM Partiyê hat xemilandin. Welatî tevî hewaya sar û baranê jî di saetên sibê de li qadê kom bûn. Di pîrozbahiyên ku bi hezaran kes beşdar bûn de alên kesk, sor û zer hat vekirin. Hêjayî bi bîrxistinê bû ku piraniya beşdaran ciwan û jin bûn. Ji qadê gelek caran dirûşmên wekî; ‘Bijî Serok Apo’, ‘Jin, jiyan, azadî’ û ‘Newroz pîroz be’ hatin berzkirin.
Welatî li gel baranê bi saetan govend gerandin. Bername piştî deqeyek rêzgirtinê ji bo bîranîna kesên di têkoşîna demokrasî û azadiyê de jiyana xwe ji dest dane destpê kir.
Piştre Hevşaredarê Mûşê Sirri Soylemez axivî û got ku ev Newroz dê ji bo gelên Tirkiyeyê bibe wesîleya aştiya civakî û demokrasiyê.
Hevşaredara Tuba Sayilgan jî got, “Gelê Kurd bi têkoşîn û biryardariya xwe, ji her demê bêhtir nêzî serketin û aştiyê ye. Ev yek jî bi saya têkoşîna gelê me û biryardariya zarokên rojê pêk hat.” Tuba Sayilgan her wiha rojnamevan Mûsa Anter, Gurbetelî Ersoz, Cîhan Bîlgîn, Nazim Daştan û Ezîz Koyluoglu ên hatine qetilkirin bibîr anî.
Her wiha piştre Parlamentera DEM Partî yê Mûşê Sûmeyye Boz jî ev tişt gotin, “Banga Ocalan ji bo hemû gelan rêya aştiyê ye. Erka me ew e ku em yekîtî û rêxitinbûna xwe xurt bikin û civakeke demokratîk ava bikin.”
Endama Komîteya Rêveber a Navendî ya DBP’ê Bêrîvan Helen Işik got, “Dem hatiye ku azadiya fîzîkî ya Rêberê Gelê Kurd Abdullah Ocalan bê misogerkirin.”
Serokwekîla Koma DEM Partî Gulistan Kiliç Koçyîgît, diyar kir ku ew piştgirî didin pêvajoya ku ji aliyê Rêber Apo ve hatiye destpêkirin û got, “Baweriya me bi wî bêdawî ye. Divê em nexşeya rê û banga dîrokî bigihînin her kesî.”
Gulîstan Kiliç Koçyîgît jî nerazîbûn nîşanî binçavkirina Şaredarê Bajarê Mezin ê Stenbolê Ekrem Îmamoglû da û wiha got: “Ji vê re darbe tê gotin, bêhûrmetiya li Destûra Bingehîn e. Bêrêziya li vîna gel e. Em vê yekê qet qebûl nakin.”
Piştî axaftinan agirê Newrozê hate pêxistin. Bi hezaran kesên ku qad tijî kirin, li gel stranên hunermend Bêwar govend gerandin.
