Wezîrê Tenduristiyê yê KKD’ê Samuel Roger Kamba diyar kir ku heta niha li welêt nêzî 131 kes ji ber şewba Ebolayê jiyana xwe ji dest dan û 513 nexweşên bi gumana şewbê hatin tespîtkirin.
Rêxistina Tenduristiyê ya Cîhanê (RTC) roja Yekşemê ji ber şewbê alarma tenduristiyê ya navneteweyî ragihandibû. Dîrektorê Giştî yê RTC’ê Tedros Adhanom Ghebreyesus anî ziman ku ew ji ast û leza belavbûna şewbê gelekî bi fikar in.
Tedros diyar kir ku Komîteya Rewşa Lezgîn a RTC’ê ji bo pêşniyarên tedbîrên demkî bike li hev civiya ye.
JI SÎNOR DERBAS KIR
Vîrûsa Ebolayê ku şewbeke zû belav dibe, di nava 50 salên dawî de li EfrîkaYê bû sedema mirina zêdeyî 15 hezar kesî.
Hate ragihandin ku navenda şewbê eyaleta Ituri ya li ser sînorê Uganda û Sudan a Başûr e. Hate gotin, ji ber madenkariya zêr a li herêmê liv û tevgereke zêde ya nifûsê li herêmê heye.
Rayedaran diyar kirin ku nexweşên bi gumana şewbê li bajarê Butembo yê ser bi eyaleta Kivu ya Bakur a li derveyî Ituri û li Goma ya di bin kontrola M23 de jî hate dîtin.
