Amedekariyên referandûma 16’ê Nîsanê didomin û tê payîn, ji sedî 60 ê gelê Rihayê di referandûmê de bibêje ‘NA’. Gelê Ereb ên Rihayê bi nêzîkbûna referandûma 16’ê Nîsanê re dengê xwe eşkere kirin û gotin, “Em ê ji bo ‘Destûra Bingehîn’ a ku xalek ji bo gel tê de nîne bibêjin ‘NA’.” Erebên Rihayê diyar kirin, ku li Tirkiyeyê mafên Ereban tên binpêkirin û gotin, wê ji welatekî xizan re bibêjin ‘NA’.
‘KURD TÊNE KUŞTIN, SIBÊ DORA EREBAN E’
Jina bi navê Hediye Ocek diyar kir ku ew ê di referandûma 16’ê Nîsanê de li dijî rejîma şexsî bibêje ‘NA’. Ocek da zanîn ku desthilatdariya AKP’ê 15 sal in welat bi tena serê xwe bi rê ve dibe û wiha axivî: “Di 15 salan de welat ber bi şerekî navxweyî ve çû, welat veguherî welatekî xizan. Em ê ji vê rewşa xizaniyê re bibêjin ‘NA’. Ji ber ku li welat xizanî zêde bû, li herêmê zarokên me fêrî tiştên xirab dibin. Ji bo em pêşiya van tiştan bigirin em ê bibêjin ‘NA’. Li welat şer heye û Kurd têne qetilkirin. Îro Kurd têne kuştin sibê dora Ereban e. Em wekî jinên Ereb em ê ji hemû bêmafî û bêedaletiyê bibêjin ‘NA’.”
‘JI BÊKARIYÊ RE ‘NA’
Ciwanê Ereb ê bi navê Mûstafa Bogday jî da zanîn ku di destûra bingehîn de xaleke bi tenê ji bo gel nîne û wiha pê de çû: “Ji derveyî talankirina kedkaran, mûçeyên kêm, bêkarî, girtin, derxistina ji kar, îşkence û desteserkirina maf, tiştekî din ku vê destûra bingehîn pêşkêşî me bike, nîn e. AKP û Qesra Erdogan hewl didin rewşa heyî di referandûmê de qanûnî bikin. Em ê ji van binpêkirinên mirovan re bibêjin ‘NA’. Li herêmê yên herî zêde têne perçiqandin gelên Ereb e, em ê ji bo mafên xwe bibêjin ‘NA’. Di referandûma 16’ê Nîsanê de çiqas denge ‘NA’ bilind bibe ew qas wê gelên Ereb azad bibin.”
‘JI BO JIYANEK BI HEV RE Û DEMOKRATÎK ‘NA’
Jina bi navê Medîne Boçek jî anî ziman ku wê ji bo jiyanek xweş û azad bibêje ‘NA’ û ev tişt got: “15 sal in, me tiştekî baş ji vê rejîma AKP’ê nedîtiye. Em ji niha û vir de jî bawer nakin tiştên baş pêk bên. Em bawer nakin ku pergaleke demokratîk, mafê mirovan were, em bawer nakin ku gelên Tirkiyeyê, Kurd, Ereb, Elewî, Ermen û Suryanî di şertên demokratîk de bijîn. Tenê wê mirinê, hêstirê çavan, xwînê bîne û ji bo vê jî em dibêjin, ‘NA’. Her wiha em ê ji destûra ku mirovan bi saxî dişewitîne re bibêjin ‘NA’. ‘NA’ wê bibe dengê azadiya gelên Ereb û herêmê.”
‘JI BO NASNAMEYA AZAD EM DIBÊJIN ‘NA’
Welatiyê Ereb ê bi navê Mehmût Bogday jî dengê xwe eşkere kir û wiha got: “Rihayê bi nasnameyên xwe yên etnîkî û çandî re, jiyana pêşketî û azad hilbijartiye. Ji bo hilbijartinan hê 17 roj mane. Ji bo nasnameya azad û çanda azad, em ê weke gelên Ereb ên Rihayê di referandûmê de bibêjin ‘NA’. Li herêmê krîza aborî her ku diçe kûrtir dibe. Em nikarin nanekî bibin mala xwe. Ji ber krîza aboriyê û ji bo nasnameya azad em ê bibêjin ‘NA’. Eger di referandûmê de dengê ‘Erê’ bi ser bikeve, wê rewşa Tirkiyeyê bêhtir aloz bibe û wê şerekî navxweyî pêk bê. Ji bo Tirkiye bibe welatekî azad û demokratîk divê tevahiya gelên Tirkiyeyê bibêjin ‘NA’. Ez bang li tevahiya gelê Ereb ê Rihayê dikim ku di referandûmê de bibêje ‘NA’.”
