Li bajarên Qamişlo, Tirbespiyê, Til Koçer, Til Hemîs, Reqa, Tebqa, Kobanê yên Herêma Bakur û Rojhilatê Sûriyeyê û Lubnanê têkildarî êrişên hikumeta veguhêz a Sûriyeyê li dijî taxên Şêxmeqsûd û Eşrefiyê yên Helebê daxuyanî hatin dayîn.
Tevgerên gel û jinan, partiyên siyasî, Gaziyên Şer û saziyên li herêmê û Kurdistaniyên li Lubnanê daxuyanî dan.
Di daxuyaniyan de hate gotin ku hêzên hikumeta veguhêz ambargoyek giran li ser taxên Şêxmeqsûd û Eşrefiyê ferz kiriye û duh jî (6 Cotmeh 2025) tevahî rêyên têketin û derketinên ji her du taxan girtibûn.
Di daxuyaniyê hate destnîşankirin ku li hember van binpêkirinan gelê Şêxmeqsûdê û Eşrefiyê ji bo vekirina rêyan çalakî li dar xistibûn û wiha hate gotin: “Lê hêzên hikumeta veguhêz li dijî gel gaza îsot û gule bi kar anîn. Di encamê de ji ber gaza îsotê hejmarek welatî bandor bûn.”
Di daxuyaniyan de hate diyarkirin ku ev kiryar û rageşiya duh çêbûye binpêkirina peymana 10’ê Adarê ku di navbera QSD’ê û hikumeta veguhêz de û peymana 1’ê Nîsanê ya di navbera Meclisa Giştî ya Taxên Şêxmeqsûd-Eşrefiyê û nûnerên hikumeta veguhêz de li Helebê, hatibû îmzekirin e. Di daxuyaniyan de bang li civaka navneteweyî û rêxistinên mafên mirovan hat kirin ku bikevin nava liv û tevgerê, van êrişan bi dawî bikin, bêyî şert û mercan ambargoya ser her du taxan şermezar bikin.
