Federasyona Gaziyên Bakur û Rojhilatê Sûriyeyê bi boneya salvegera yekemîn a şehadeta hevreyê xwe Tekîn Goyî de daxuyaniyek weşand.
Di daxuyaniyê de wiha hate gotin:
“Em hevalê xwe gaziyê şer Tekîn Goyî yê 19’ê Tebaxa 2024’an li Qamişlo di encama êrişeke dewleta Tirk a dagirker de şehîd bû, di yekemîn salvegera şehadeta wî de bi rêz û hurmet bi bîr tînin.
Heval Tekîn weke şoreşgerekî her tim rastiya heqîqeta mirovatiyê ya bingehîn diparast jiya û têkoşîn kir. Li hemberî neheqiyan û dijminên mirovatiyê têkoşîna rûmeta mezin a mirovatiyê pêş xist. Di her kêliya jiyana xwe de sekn, helwest û têkoşîneke ber bi azadiyê ve ya herî esîl a layiqî Apoçîtiyê nîşan da.
Hevrê Tekîn şoreşgerî dildarê gelan bû û qezenckirina mirovan ji xwe re kiribû yek ji prensîbên jiyanê. Her tim ji gelê xwe bawer bû û nêzîkatiya rast a ji nirxan re ji bo xwe kir bingeh. Pêşeng û serkêş Tekîn Goyî li Botana li dilê têkoşîna Tevgera Azadiyê ye, ji eşîra Goyî ye, ya bi welatparêzî û dilsoziya xwe bi xaka xwe tê naskirin. Hevalê Tekîn çanda Botanê ya mîna dîrokê qedîm e her tim parast û di kesayeta xwe de bi serbilindî da jiyandin.
Hevrê Tekîn di meşa xwe ya azadiyê ya zêdetirî 30 salî de bi perwerdeya ji Rêber Apo wergirtibû, li her qada welat, di pêvajoyên herî zor û zehmet de şoreşgerên Apoyî divê çawa têkoşîn bikin nîşanî dost û dijminan de. Ji bo soza dabû Rêbertî, şehîdan, hevalan û gelê xwe bêkêmasî pêk bîne pir baldar û hişyar bû. Li gor gotina xwe ya, “Ya mirov nebe şoreşger yan jî dema bibe şoreşger jî teqez divê mirov li gorî wê soza xwe be û bare şoreşê ji dil hilgire” di nav refên berxwedana azadiyê de cih girt.
Heval Tekîn dizanîbû ji bo parastin û pêşxistina xeta Tevgera Azadiyê û nirxên hatine avakirin, Rêber Apo berpirsiyartiyeke mezin daye ber gaziyên şer. Heval Tekîn ji bo gelê xwe û şoreşa azadiyê lingekî winda kiribû. Bi zanebûna “Gazî pîroz in, divê li gor wê pîroziyê tevbigerin” sekneke herî mînak a milîtantiya fedaî ya Apoyî nîşan dida. Bi her kar û xebata têkoşîna gelan ve radibû, lewma mezin difikirî û berpirsiyartiyên her kes nikarîbû ji bin derkeve bi serbilindî bi encam dikir
Em jî weke gaziyên şer ên hevalên fermandar Tekîn Goyî heya dawiyê em ê di rêya hevrê Tekîn û tevahî şehîdên azadiyê ji me re rohnî kirine de bimeşin.
Li ser vî esasî di şexsê fermandar Tekîn Goyî de em tevahî şehîdên azadiyê bi bîr tînin. Ji bo Şoreşa Bakur û Rojhilatê Sûriyeyê ya kedeke pir mezin a heval Tekîn jî têde heye, bêhtir pêş bikeve bi hêz û îradeya me ji Rêbertiya xwe û şehîdên xwe girtiye em ê weke her tim bi rola xwe rabin û têkoşîna xwe mezin bikin.”
Şoreşger û yek ji pêşengên têkoşîna azadiyê Îsmet Unver (Tekîn Goyî) ku gelek herêmên Kurdistanê 32 salan têkoşînek bêhampe meşand, 19’ê Tebaxa 2024’an de dema ku li bajarê Qamişlo erka xwe ya xebatên tendurustiyê didomand, di encama êrişeke hewayî ya dewleta Tirk a dagirker de şehîd bû.
