Komeleya Alîkarî û Hevgirtinê bi Malbatên ku Xizmên Xwe li Dergûşa Şaristaniyan Winda Kirine (MEBYA-DER), Tevgera Jinên Azad (TJA), Komeleya Rojnamevanên Jin ên Mezopotamyayê (MKG) û Komeleya Rojnamevanên Dîcle Firatê (DFG), rojnamevan Hêro Bahadîn û Gulistan Tara ên ku di 23’yê Tebaxa 2024’an de li navçeya Seyîdsadiq a bajarê Silêmaniyê di êrîşa Tirkiyeyê de hatibûn qetilkirin, bi bîr anîn.
Bîranîn li ser gora Gulistan Tara li Goristana Tilmerç hate lidarxistin. Malbata Tara, rojnamevan, nûnerên partiyên siyasî û nûnerên rêxistinên sivîl beşdarî bîranînê bûn. Di bîranînê de wêneyên rojnamevanan hatin hilgirtin, gul danîn ser gorê û dirûşmeya “Şehîd namirin” hate berzkirin.
Rêvebera Meclîsa Jinan a Partiya Wekhevî û Demokrasiyê ya Gelan (DEM Partî) Gulsum Esen di bîranînê de axivî û got, “Em ê rêya Hêro Bahadîn û Gulistan Tara bişopînin û xeyalên wan pêk bînin.”
Xwişka Tara, Dîcle Erdem jî di axaftina xwe de li ser têkoşîna xwişka xwe û hevalên wê rawestiya û got, “Em hemû xemgîn in. Lê tişta ku me li ser piyan dihêle têkoşîna wan a bêwestan e. Dibe ku Gulistan û Hêro bi fîzîkî ne bi me re ne, lê ew ê her gav bi ruhî û fikrên xwe bi me re bin. Bi hezaran hevalên wan bi me re ne û hûn jî bi me re ne. Hûn ê her gav ji bo heqîqetê derxin holê li van qadan bin.”
Dîcle Erdem bi bîr xist ku herdu rojnamevan di “êrîşeke hovane” de hatin qetilkirin û got, “Wan hewl da ku rastiya li çar parçeyên Kurdistanê eşkere bikin. Lê ew ji aliyê hêzên ku naxwazin rastî were bihîstin ve hatin qetilkirin. Gulistan, Nazim, Cîhan, Nagihan wê her tim hebin û wê pêl bi pêl tevlî vê têkoşînê bibin. Çapemeniya azad wê qet neyê bêdengkirin.”
Bîranîn bi dirûşmeya “Çapemeniya Azad wê nayê bêdengkirin” bi dawî bû.
