Meclîsa Jinan a Partiya Wekhevî û Demokrasiyê ya Gelan (DEM Partî) starta “Hevdîtinên Jinan a ji bo Avakirina Aştî û Civaka Demokratîk” li Stenbolê da. Hevdîtina jinan li otelekî li Taksîmê hat lidarxistin. Meclîsa Jinan a DEM Partî, rêxistinên jinan, feminist û platform di hevdîtinê de hatin ba hev. Gelek jin tevlî hevdîtina bi ser navê “Di demokrasiya xwecihî de bi têkoşîna jinê siyaseta aştiyê” bûn.
‘BÊ JINAN PIRSGIRÊK ÇARESER NABE’
Berdevka Meclîsa Jinan a DEM Partiyê Halîde Turkoglu axivî û got: “Me weke meclîsê piştî banga dîrokî ya ‘Aştî û Civaka Demokratîk’ a Birêz Ocalan hin nîqaş meşandin. Di van nîqaşan de tiştên derketin pêş li ser aştî û civaka demokratîk bûn. Siyaset bi xwe jî bi zimanê xwe yê mêrsalar behsa civaka demokratîk û aştiyê nake. Em ewilî bi pêkhateyên jinan ên partiyên ku di qada siyaseta demokratîk de ne û li Meclîsê hatin ba hev. Ger ku ev pirsgirêk di meclîsê de bê çareserkirin, bêguman bêyî jinan çareser nabe. Civakbûna aştiyê tenê bi siyaseta navendî pêk nayê. Pêwîste li herêmê, li qadê xwe bi rêxistin bike.”
TÊKOŞÎNA HEVPAR A JI BO AŞTIYÊ
Halîde Turkoglu bal kişand bi ser rewşa li Sûriyeyê û ev tişt got: “Eger ku Sûriyeyek demokratîk bê avakirin, divê jin jî parçeyek ji wê bin. Bi banga 27’ê Sibatê re em ê weke jin di avakirina civaka demokratîk de têkoşînê çawa mezin bikin? Desthilatdarî dixwaze li gorî xwe şewe bide pêvajoyê.
Lê em jin di têkoşîna xwe ya dîrokî û hevbeş de xetereyên bi vî rengî dît. Em çawa dikarin di avakirina civaka demokratîk de têkoşîna azadî û wekheviyê ya jinan bikin navenda siyasetê? Di siyaseta giştî de qala aşitî û civaka demokratîk were kirin jî, têkoşîna jinan a azadî û wekheviyê li paş dimîne. Dema ku qala avakirina civaka demokratîk tê kirin, komkujiyên jinan dewam dike. Rojevên jinan divê bi tu awayî li neyên nixumandin, divê ev xet zêdetir were dîti. Meseleyên tundiya zayendî, binçavkirin û girtin… Divê em têkoşîna xwe ya wekheviyê bikin rojeva sereke ya avakirina civaka demokratîk. Pêwîstiya me bi pêşniyarên rêxistinên jinan û femîsîtan heye. Li aliyekî em dixwazin vê pêvajoyê li Meclîsê bibînin, li aliyê din jî bi xwecihî nîqaş bikin.”
Piştre civîn ji çapemeniyê re girtî dewam kir.
