Rêxistina Çavdêriya Mafên Mirovan (HRW), Projeya Piştevaniya Dozên Mafên Mirovan a Tirkiyeyê û Komîsyona Navneteweyî ya Hiqûqnasan, bang li Komîsyona Hevgirtina Neteweyî, Xwişk-Biratî û Demokrasiyê ya li Tirkiyeyê hatiye avakirin kirin ku reformên qanûnî û edaletê yên berfireh pêk bînin.
Rêxistinan, di daxuyaniya hevpar a ku pêşkêşî komîsyonê kirin de destnîşan kirin ku ji bo şer bi rengekî mayînde bi dawî bibe û aştî bidome reform girîng in.
Komîsyon di Tebaxa 2025’an de piştî biryara PKK’ê ya xwe fesixkirinê û şewitandina çekan hate avakirin. Rêxistinan dan xuyakirin ku ji bo aştî mayînde be, ne tenê bêdengkirina çekan, di heman demê de guhertina qanûnên cudakar ên li dijî Kurdan û civakên din jî girîng e.
Di daxuyaniyê de çar reformên bingehîn hatin pêşniyarkirin:
Ji nû ve sererastkirina qanûnên dijî-terorê – Rakirina xalên nezelal ên ku rojnamevan, parêzer û çalakvanan hedef digirin.
Bidawîanîna zextên li ser siyasetmedarên hilbijartî – Ji kar derxistin divê li gorî pîvanên demokratîk ên navneteweyî pêk bên.
Divê mafê kombûnên aştiyane bên misogerkirin – Divê qanûnên xwepêşandanan û destwerdanên polîsan ji nû ve bên sererastikirin.
Divê “mafê hêviyê” bê naskirin – Derfetên serbestberdanê ji bo kesên ku cezayê muebetê yê giran digirin divê di pêvajoyeke nirxandineke rastîn de bêne kirin.
Rêxistinan, her wiha diyar kir ku divê serxwebûna dadweriyê were xurtkirin û mekanîzmayên hesabpirsînê ji bo binpêkirinên berê werin damezrandin.
Rêxistinan, diyar kirin ku aştî tenê bi çareserkirina neheqiyên avahîsaziyê pêkan e.
