Dewleta Îsraîlê roja Sêşemê daxuyaniyek da û got, “Hamasê berdana dîlgirtiyên Îsraîlî careke din red kir” û îdîa kir ku li ser vê yekê êrîş kirine.
Hate ragihandin ku êrîş tevahiya şevê li Şerîda Xezeyê hatin kirin. Wezareta Tenduristiyê ya Hamasê diyar kir ku di êrîşan de herî kêm 330 kes mirin. Li gorî daxuyaniyê piraniya kesên hatin kuştin jin û zarok bûn. Her wiha bi sedan kes jî birîndar bûn ku rewşa bi dehan ji wan krîtîk e.
Li gorî daxuyaniya hikumetê, ev êrîşên hewayî yên Îsraîlê ku Serokwezîr Benyamîn Netanyahû û Wezîrê Parastinê Israel Katz biryar li ser da, weke bersiva li dijî redkirina berdana dîlgirtiyan û redkirina pêşniyarên Sefîrê Serokê DYE’yê Steve Witkoff û navbeynkaran hatiye kirin.
Di daxuyaniyê de hate gotin, “Îsraîl wê ji niha û pê ve hêza leşkerî ya li dijî Hamasê zêde bike û bi vî rengî tevbigere.”
AGAHÎ JI DYE’YÊ RE HATE DAYIN Û DESTÛR DA
Hate ragihandin ku Qesra Spî beriya van êrîşan hate agahdarkirin. Berdevka Serokatiyê Karoline Leavitt ji Fox Newsê re axivî û got, “Rêveberiya Trump û Qesra Spî di mijara êrîşên îşev ên li ser Xezeyê de hatin agahdarkirin.” Karoline Leavitt bi dewamî got, “Weke ku Serok Trump bi rengekî eşkere got, Hamas, Hûsî, Îran û her kesên dixwazin Îsraîlê, Dewletên Yekbûyî yên Emerîkayê terorîze bikin wê neçar bimînin berdêla vê bidin.”
Li gorî Wall Street Journalê Serokê DYE’yê Donald Trump bi xwe destûra operasyonê da.
