Komîteya Gelan û Baweriyan a KCK’ê, ji ber Rojiya 12 Meleyan û parvekirina Aşûreyê daxuyaniyeke nivîskî weşand. Di daxuyaniyê de, kesên ku di berxwedana Kerbelayê de jiyana xwe ji dest dane bi hurmetî û minetdarî hatin bîranîn û hat xwestin ku xizmetên kesên rojî girtine, dua kirine û Aşûreyê parve kirine li qata Heq qebûl bibin.
Di daxuyaniyê de, hat destnîşankirin ku têkoşîna li Kerbelayê hatiye dayîn, têkoşîna maf li dijî neheqiyê û ya mazlûman li dijî zaliman e. Her wiha hat diyarkirin ku, berxwedana Mele Huseyn û Zeynebê, mîrateya hevpar a hemû kesên ku ji bo edalet, wekhevî û xwişk-biratiyê têdikoşin e. Hat diyarkirin ku, êrîşên li ser gelan, jinan, kedkaran, baweriyan û xwezayê Kerbelayên vê demê ne û bang hate kirin ku li dijî zilmê helwesta Huseynî were nîşandan.
Di daxuyaniyê de, hat gotin ku Elewî di seranserê dîrokê de xwedî li kesên ku di xeta heqîqet û edaletê de berxwedanê dikin derketine; bang li civaka Elewiyan hat kirin ku bi awayekî hîn rêxistinkirî tevli pêvajoya ku bi “Banga Aştî û Civaka Demokratîk” dest pê kiriye bibin û hîn bi hêztir piştgiriyê bidin têkoşîna demokrasiyê.
Daxuyaniya Komîteya Gelan û Baweriyan a KCK’ê bi vî rengî ye:
“Kurdên Rêya Heq û canên Elewî li gel Misilmanyên Şîe, di salvegereke nû de Berxwedana Kerbelayê û şehîdên wê bi hurmetî û minetdarî bi bîr tînin. Bi vê mûnasebetê, bi hest û ramanên wekhev, daxwaz hatine kirin, dua hatine kirin, rojî hatine girtin û Aşûre hatine parvekirin.
Têkoşîna ku li Kerbelayê hatiye dayîn, têkoşîna heq li dijî neheqiyê û ya mazlûman li dijî zaliman e. Ji ber vê yekê ji aliyê gelên xwedî nasname û baweriyên cuda ve pîroz hatiye dîtin û di hişê mirovan de cih girtiye. Sekna Kerbelayê, di deftera mîratê ya kesên ku ji bo edalet, wekhevî û xwişk-biratiyê li ber xwe didin de hatiye nivîsandin. Kurdên Rêya Heq û canên Elewî, vê berxwedana ku di şexsê Mele Huseyîn û Zeynebê de sembolîze bûye û gihîştiye roja me, bi pîrozkirinê bi bîr tînin. Her wiha Misilmanyên Şîe yên ji her gelekî, ji bo şehîdên Kerbelayê şînê digirin û wan bi bîr tînin. Em niyaz dikin xizmetên her kesê ku bi rojiya xwe û bi parvekirina loqmeyên xwe yên heqê tevlî van bîranînên xwedî nirxên mezin ên baweriyê bûne, li qata Heq qebûl bibin. Em hêvî dikin ku ev xizmet ji bo mirovahiyê û herêma me aştî û aramiyê bîne, piştgirî û xwişk-biratiya navbera gelên me mezin bike. Em ji dil û can dixwazin ku ev baweriya ku dibe sedema rojîgirtinê û parvekirina loqmeyan, ji bo jiyanê bibe rêber û ji bo rê her dem bibe mûrşîd. Em hêvî dikin ku Pîr û Ana, kevneşopiya Mele Huseyîn û Zeynebê her dem zindî bihêlin. Bi mûnasebeta van bîranînan, di serî de Elewî, em hemû Misilmanên ku Îslamê bi cewherê wê yê gelparêz û demokratîk dijîn, vedixwînin ku di nava xwişk-biratiyê de mil bidin milê hev û li dijî Kerbelayên demê di nav sekneke Huseynî de bin.
Li herêma me rojên Kerbelayê bi dawî ne bûne. Înkar, zext û şîdeta ku bi sedsalan e li ser gel û baweriyan tê ferzkirin bi dawî ne bûye. Komkujiyên li ser jinan bi zêdebûnê re berdewam dikin. Xwezaya me ya pîroz ku her goşeyekî wê musahîbê Jîyareke qedîm e, ji bo berjewendiyên şirketan tê xwestin ku were texribkirin. Mafên kedkaran her roj hîn bêtir tên desteserkirin. Dewlet û hikûmetên ku tu hiqûq û nirxên mirovan nasnakin, tenê berjewendiyên desthilatdariya xwe li ber çavan digirin û tevdigerin, bi zext û êrîşên xwe dibin sedema encamên herî rûxîner û wêranker ên dîrokê. Li herêma me darvekirin, koçberkirin, desteserkirin û talan, bi taybetî ji aliyê hinek dewlet û komên ku ji xwe re dibêjin Misilman, li dijî gel û baweriyên qedîm tên meşandin. Ev hemû xerabî Kerbelayên serdemê ne. Em dixwazin parve bikin ku em bawer dikin ku li dijî van zilmên ku îro tên meşandin, derketina bi xeta berxwedanê ya ku Huseyîn û Zeynebê mîrat hîştine, rêya her herî rast e ji bo zindîhiştina şehîdên Kerbelayê ye.
Elewî, bêyî ku li bawerî û neseba wan binêrin, kesên ku ji bo eşqa Heq li ber xwe dane wekî hevrê dîtine, ji xwe hesibandine, mîrata wan ji bîr nekirine û xwedî derketine ku wan zindî bihêlin. Hezkirin, bîranîn û hevpariya di baweriya kesên ku li aliyê qencî û bedewiyê de disekinin û di rêya heqîqetê de canê xwe feda dikin, cewherê Elewîtiyê ye. Elewiyan bi vê cewherê her dem zanibûne ku li aliyê yê mafdar bisekinin. Rojiya 12 Meleyan û loqmeya Aşûreyê jî îfadeya vê ruh û baweriyê ye. Bi vê mûnasebetê, di serî de Elewiyên Rêya Heq, em bang li hemû Elewiyan dikin ku vê cewherê Elewîtiyê hîn bi hêztir zindî bihêlin û mezin bikin. Em hemû Elewî vedixwînin ku li dijî her cure hîle, xefik û fîtneyên ku li ser xeta Yezîd ferz dikin, bi xeta Huseynî derkevin û berxwedana tije bi israr û wêrekiya Zeynebê berdewam bikin. Bi vê baweriyê, em bang li Elewiyên li Tirkiye û Bakurê Kurdistanê dikin ku bi awayekî hîn rêxistinkirî tevlî pêvajoya ku bi ‘Banga Aştî û Civaka Demokratîk’ dest pê kiriye bibin û hîn bi hêztir piştgiriyê bidin têkoşîna demokrasiyê. Bi hestên xwe yên ji dil em dibêjin; xizmeta ku we di Rojiya 12 Meleyan de kiriye di deftera heq de were nivîsandin. Bila ronahiya rê, hemû tariyan ronî bike. Meşa we ya heq û heqîqetê ya ku we bi eşqa Pîr meşandiye, bila ji bo gelên me aştî û aramiyê bîne. Em careke din dibêjin bila hemû can di nav yekitiyê de zindî bin û em hêvî dikin ku yekitiya we û aramiya we li ser van axan bibe sedema dewlemendiyên ku her kes jê nesîb bigire.”
