Hevseroka Giştî ya Komeleya Mafên Mirovan (ÎHD) Eren Keskîn êrişên desthilatdariyê yên li ser realîteya Kurd ji ANF’ê re nirxand û anî ziman ku hewl didin Kurdbûnê qedexe û ceza bikin.
‘AQLÊ DEWLETÊ YÊ SALÊN 1990’Î LI SER DESTHILATDARIYÊ YE’
Eren Keskîn ku binpêkirina mafên mirovan, bûyerên kuştinê yên kontrayan, windakirina di binê çavan de, şewitandina gundan ên di salên 1990’î de bi destê dewletê hatin kirin bi ser dît û şahidî jê re kir, anî ziman ku aqlê dewletê yê salên 1990’î niha li ser desthilatdariyê ye. Eren Keskîn ragihand ku demeke din a ji tundbûna polîtîkayên dewletê destpê kiriye û got, ev polîtîka careke din bi êrişa li ser nirxên gelê Kurd tê meşandin.
Eren Keskîn bi bîr xist ku Komara Tirkiyeyê dewleteke welê ye ku mohra xwe daniye binê gelek peymanên navneteweyî û anî ziman ku di halê hazir de ev peyman hemû bi temamî têne binpêkirin. Eren Keskî bi bîr xist ku mînaka dawî ya vê yekê jî girtina mirovên ku govenda Kurdî digerand bû û destnîşan kir ku ev yek nayê qebûlkirin.
‘BI RÊYA SÛCÊ NÎNE, JIYANA MIROVAN TÊK DIBIN’
Eren Keskîn bi bîr xist ku dirûşma ‘Bijî Serok Apo’ ya ku weke hincet ji girtinê re hatiye nîşandan, hem bi biryarên Dadgeha Bilind, hem jî bi biryarên Dadgeha Mafên Mirovan a Ewropayê (DMME) hatiye destnîşankirin ku sûc nîne. Eren Keskîn diyar kir ku bi rêya tiştekî ne sûc e jiyana mirovan têk dibin û got, “Mînak beriya du rojan li Sêrtê li dawetekê bi îdîaya ku li ber strana gerîla govend gerandine du zarok hatin girtin. Sosyolojiyeke vê cografyayê heye. Heta ku ev sosyolojî neyê dîtin, hûn nikarin van weke sûc ragihînin. Li dawetên cerdevanan jî ev stran têne gotin, ku di medyayê de jî gelek caran hate weşandin. Ev stran li wê cografyayê ji aliyê gel ve hatine qebûlkirin. Di vir de hewl didin Kurdbûnê ceza bikin. Ji Kurdan re dibêjin ‘Hûn ê weke Kurd nejîn’, dixwazin peyameke bi vî rengî bidin ‘Dibe ku hûn Kurd bin, lê belê hûn neçar in mîna Tirkan bijîn’.”
‘BERÊ DIKUŞTIN, NIHA JÎ BI KONTROLKIRINA JIYANA ME DIGIRIN’
Eren Keskîn destnîşan kir ku ev kiryarên kêfî nîşan didin ku metirsî li ser Kurdan heye û got, “Berê dikuştin, tine dikirin. Niha jî her kêliya jiyana me kontrol dikin û digirin. Ev tiştekî gelekî metirsîdar e.”
Eren Keskîn nerazîbûn nîşanî xemsariya li hemberî vê rewşê da û got, “Di vê mijarê de ji bilî Kurdan, ji bilî rêxistinên mafên mirovan û hiqûqî kes dengê xwe nake. Mînak di rojeva muxalefeta bingehîn de nîne. Min nebihîst ku carekê tiştek gotin. Mirov ji ber ku govend gerandine li dawetan têne girtin. Bi her awayî mafê jiyanê tê binpêkirin. Weke ku min got, hewl didin Kurdbûnê, mafê Kurdbûnê qedexe bikin.”
‘AKP ÊDÎ BÛYE MHP’
Eren Keskîn bi bîr xist ku dijminatiya li Kurdan gihîştiye wê astê ku hişyariyên bi Kurdî yên trafîkê jî jê bibin û got, “Şaredarî ji bo pêşî li qezayên trafîkê bigirin bi mafdarî bi Kurdî hişyariyan dinivîsîne. Ji ber ku mirovên bi Tirkî nizanin hene, bi taybetî jî mirovên extiyar. Nikarin xwe li vê jî rabigirin. Eger tu bi Tirkî nizanibe ku tu dikare bê eciaqandin. Dibêjin, tu di qezaya trafîkê de bimire jî ne xema kesî ye. Bi dîtina min di vir de bandora MHP’ê gelekî mezin e. Ji ber ku MHP bi temamî kontrol xistiye destê xwe. AKP êdî bûye MHP. MHP li desthilatdariyê ye. Rewşeke bi wî rengî heye. Gelê Kurd li gel hemû tevdan û sorkirinan bi rengekî rast disekine. Naxwaze tevlîhevî çêbibe.”
