Di destpêka pêlên êrîşan a li ser herêma Bakur û Rojhilatê Sûriyeyê de, bi hezaran kesan berê xwe dan bajarê Kobanê û li wir ji bo ewlehiya xwe û zarokên xwe niştecih bûn. Ji bajarên cuda yên weke Reqa, Tebqa, Eyn Îsa, Til Elsemin, Sirîn û gelek cihên din heta bi gundewarên bajarê Kobanê jî koçberan berê xwe dan navenda bajêr.
Heta niha zêdeyî 200 hezar kes berê xwe dane bajarê Kobanê û li zêdeyî 70 navendên cuda jî niştecih bûne. Rewşa wan koçberan jî kirîtîk e, bi taybet jî koçberên ku li Muzexaneya bajarê Kobanê bi cih bûne. Li wir gel di nava xaniyên ku ji wî şerî man e de cihê xwe digrin. Ew di nava wan kevir û kavilan de ku odeyek bi erdê re bûye yek û yê din jî hinekî têde debarê jiyanê dibe, dimînin û debara jiyana xwe dikin.
Ev koçber jî bi hêviya vegera ewle ya herêmên xwe ne. Ew li bendê ne ku vegerin ser mal û milkên xwe. Bi taybet yên ji bajarê Kobanê jî malên wan ji aliyê çeteyên Hikumeta Demkî ya Sûriyeyê ve hatine talankirin. Hemû mal û amûrên wan ên di malê de dizîn e û ji xwe re birine, bi dehan ji wan gundan rastî van bûyeran hatine, çeteyan bi dehan mal jî şewitandine û talan û wêran kirin e.
Koçberên li wir ji ANF’ê re axivîn û diyar kirin ku êdî ew dixwazin vegerin malên xwe.
‘MAL Û MILKÊN ME TALAN Û WÊRAN KIRIN E’
Dayîka bi navê Emîne Sibhî Îsmaîl dibêje ku ew 8 kes in lê ew nikarin vegerin cih û warên xwe û got, malên wan talan kirin e, gundê wan hemû tiştên wan dizîn e û niha di nava kavilan de jiyan dikin.
Emîne wiha axaftina xwe dewam dike, “Ruxmî vê rewşê jî em rojiyên xwe jî digirin, lê êdî em pêdiviyan nikarin peyda bikin. Tenê daxwaza me ew e ku em bi ewle vegerin ser mal û milkên xwe. Niha li vir kehrebe jî di seetên herî dirêj de qut dibe. Av jî tune em ji malan avê peyda dikin.”
