Heyeta Koma Çep a Yekbûyî (UEL) a Meclîsa Parlamenteran a Konseya Ewropayê (MPKE) di çarçoveya statuya Rêber Apo, ‘mafê hêviyê’ û Pêvajoya Aştî û Civaka Demokratîk de li Enqereyê hin hevdîtin pêk anî.
Heyetê destpêkê serî li Wezareta Edaletê da ku biryarên Dadgeha Mafên Mirovan a Ewropayê (DMME) bi cih bîne. Piştî serlêdanê endamên heyetê li pêşiya wezaretê daxuyaniyek dan çapemeniyê.
Hevserokê UEL’ê û Parlamenterê AKEL a Qibrisê George Loucaides, Hevseroka UEL’ê û Endama Senatoya Spanyayê ya ERC’ê Laura Castel, Alîkarê Serokê Koma UEL’ê û Endamê Senatoya Fransayê yê ji Koma Fransa ya Serî Natewîne Emmanuel Fernandes, Seroka Rûmetî ya MPKE’yê Tiny Fox û Sekretera Koma UEL’ê Anna Kolotova beşdarî civîna çapemeniyê bûn.
‘HÎN BERSIV JI DAXWAZÊN ME RE NEHATIYE DAYIN’
Di daxuyaniyê de hate ragihandin ku ji bo serdana Rêber Apo, Hevserokên Giştî yên HDP’ê yên berê Selahattîn Demîrtaş û Fîgen Yuksekdag serî li saziyên pêwendîdar hate dayin.
Hate gotin, di heman çarçoveyê de daxwaza hevdîtinê ji Wezareta Edaletê hate kirin, lê belê heta niha bersiveke fermî ji serlêdanên wan re nehatiye dayin.
‘PÊVAJOYA AŞTIYÊ FIRSENDEKE DÎROKÎ YE’
Heyetê diyar kir ku ew Pêvajoya Aştî û Civaka Demokratîk a li Tirkiyeyê ji nêz ve dişopîne û destnîşan kir ku aştiya mayinde ne tenê ji bo Tirkiyeyê wê ji bo Ewropayê û Rojhilata Navîn encamên girîng bi xwe re bîne.
Hate ragihandin ku di demekê de ku şer û polîtîkayên jinûve biçekbûnê di rojevê de ye, divê piştgirî ji her gava ji bo aştiyê ya li Tirkiyeyê re bê dayin û bang li hemû aliyên pêvajoyê hate kirin ku bi biryardarî bimeşin.
‘DIVÊ MERCÊN ABDULLAH OCALAN BÊNE SERERASTKIRIN’
Heyetê anî ziman ku ew piştgiriyê didin wê yekê ku mercên Rêber Apo bi rengê ku pêvajoya aştiyê hêsan bike û atmosfera danûstandinan xurt bike bêne sererastkirin.
Di daxuyaniyê de hate gotin, “Ji bo demokratîkbûna Tirkiyeyê û mayindekirina aramiya herêmî em bang li hemû aliyên Pêvajoya Aştî û Civaka Demokratîk kirin ku vê hewldanê bi biryardarî û berpirsyariyê bi pêş ve bibin. Di vê çarçoveyê de em piştgiyeke xurt didin wê yekê ku mercên girtîgehê yên Birêz Ocalan bi rengê ku karibe vê pêvajoyê bi pêş ve bibe û hêviyên aştiyê xurt bike, bêne sererastkirin.”
Di dewama daxuyaniyê de bang hate kirin ku biryara “mafê hêviyê” ya DMME’yê bi cih bê anîn ku têkildarî Rêber Apo hate dayin û hate gotin, “Bicihanîna ‘mafê hêviyê’ di dema herî nêz de ya ku Dadgeha Mafên Mirovan a Ewropayê têkildarî Birêz Ocalan da, mecbûriyeteke hiqûqî ye.”
HEVDÎTIN WÊ DEWAM BIKIN
Koma Çep a Yekbûyî ya MPKE’yê diyar kir ku di serî de Meclîsa Milet a Mezin a Tirkiyeyê tevkariya hemû saziyên dewletê yên pêwendîdar û Konseya Ewropayê ya li pêvajoyê girîng e.
Heyetê piştî daxuyaniyê serdana Navenda Giştî ya DEM Partiyê kir ku bi Hevserok Tulay Hatîmogûllari re hevdîtinê bike. Koma UEL’yê diyar kir ku ji bo piştgiriya bi pêvajoyê re wê hevdîtinên xwe yên bi hemû aliyan re dewam bike.
