Bi pêşengiya Federasyona Elewî Bektaşî (ABF), Federasyona Elewiyan a Tirkiyeyê (ADFE), Weqfa Çanda Anadoluyê ya Haci Bektaş Velî (HBVAKV) û Komeleyên Çanda Elewî (AKD) bi wesîleya 47’emîn salvegera Komkujiya Mereşê li Îskeleya Kadikoyê daxuyaniya çapemeniyê hate dayîn. Di daxuyaniyê de pankarta “Me Komkujiya Mereşê ji bîr nekir, em ê nedin jibîrkirin” hate vekirin û dowîzên “Hezar silav ji jinên Elewî re ku li Sûriyeyê li ber xwe didin” hatin hilgirtin. Gelek kes tevlî bîranînê bûn.
Beriya daxuyaniyê Cîhan Saltuk Dede olan da.
Li ser navê saziyên hevpar Merve Demîr daxuyaniya çapemeniyê xwend. Merve Demîr diyar kir ku di Komkujiya Mereşê de ku di navbera 19-26’ê Kanûna 1978’an de hat jiyîn, bi sedan Elewî hatin qetilkirin, bi deh hezaran kes neçarî koçberiyê hatin hiştin û destnîşan kir ku komkujî êrîşekî plankirî û li ser bingeha baweriyê bû.
‘BIRÎNEKÎ VEKIRÎ YA KU GEF LI PÊŞEROJÊ DIXWE YE’
Merve Demîr bilêv kir ku di 47’emîn salvegera Komkujiya Mereşê de êş û hêrsa komkujiyê wekî roja ewil e û anî ziman ku tevî dema derbasbûyî jî edalet nehatiye pêkanîn. Demîr wiha got, “Mereş ne tenê trajediyeke ku di demboriyê de hatiye jiyîn e, ji ber ku edalet pêk naye birînekî vekirî ye ku gef li îro û pêşerojê dixwe. Mirov tenê ji ber nasnameyên xwe yên Elewîtiyê hatin qetilkirin, dewletê berpirsyariya xwe ya parastina welatiyên xwe pêk neaniye.”
‘KOMKUJIYA MEREŞÊ DIVÊ JI NÛ VE WERE LÊPIRSÎNKIRIN’
Merve Demîr bi bîr xist ku doza Mereşê bi salan hate dereng xistin, arşîvên serfermandariya giştî hatine veşartin û cihên gora kesên hatine qetilkirin nehat eşkerekirin û wiha got, “Komkujiya Mereşê sûcekî mirovahiyê ye. Heta ku kujer neyên eşkerekirin û dawî li polîtîkayên bêcezatiyê neyê anîn aştiya civakî ne pêkan e. Divê hemû arşîvên dewletê werin vekirin, Komkujiya Mereşê bi awayekî serbixwe û bêalî ji nû ve were lêpirsînkirin.”
Merve Demîr diyar kir ku Mereş ne tenê komkujiyeke ku li Tirkiyeyê hatiye jiyîn û bi bîr xist ku Elewiyên li Sûriyeyê rastî êrîşên sîstematîk û koçberiya bi zorê tên û wiha got, “Bi hezaran sivîl tenê ji ber nasnameya xwe hatine qetilkirin.”
Merve Demîr bilêv kir ku bûyerên li Mereşê û êrîşên li ser Elewiyên li Sûriyeyê berhema heman îdeolojiya nefretê ye û wiha got, “Êşên me yek e, divê têkoşîna me jî bibe yek. Heta ku rastî eşkere bibin, edalet pêk were û welatîbûna wekhev pêk were, têkoşîna me bidome.”
