Rûniştina asayî ya 62’emîn a Konseya Mafên Mirovan a Neteweyên Yekbûyî wê di navbera 15’ê Hezîranê û 10’ê Tîrmeha 2026’an de li bajarê Cenevre yê Swîsreyê pêk were. Di rûniştinê de li gel rojeva mafên mirovan wê mijarên hawirdorê, krîza avhewayê, gemarîbûn, windabûna cihêrengiya biyolojîk û mafê hawirdoreke bi tenduristiyeke baş bêne nirxandin.
Tora Hawirdorê ya Cenevreyê beriya rûniştinê çalakiyên têkildarî mafên mirovan û hawirdorê ragihand. Di bernameyê de rûniştinên krîza avhewayê û bandora hilweşîna hawirdorî ya li ser mafên mirovan, çalakiyên cihêreng û civînên pisporan wê hebin.
Krîza hawirdorê salên dawî bû yek ji sernavên bingehîn ên rojeva mafên mirovan a Neteweyên Yekbûyî. Pirsgirêkên; guherîna avhewayê, astengiya li pêşiya peydakirina ava paqij, qirêjiya heayê, bermahiyên toksîk, kêmbûna daristanan, projeyên madenê û koçberiya ji cih û warê xwe êdî ne tenê meseleya hawirdorê ye, di heman demê de bi mafê jiyanê, mafê tenduristiyê, mafê xurekê, mafê stargehê û mafên gelên xwecihî re têne nirxandin.
Di rûniştina 62’emîn a konseyê de jî tê payin ku encamên xerabûna hawirdorî li ser civakên xizan, jin, zarok, gelên xwecihî, koçber û welatên ku herî zêde ji krîza avhewayê bi bandor dibin, bêne nîqaşkirin.
NÎQAŞÊN AVHEWAYÊ DI ROJEVÊ DE YE
Rûniştin di demeke welê de tê lidarxistin ku di asta navneteweyî de nîqaşên li ser edaleta avhewayê û berpirsyariya hawirdorî zêde bûne.
Li gorî rêxistinên mafên mirovan zerarên ku dewlet û şîrket li hawirdorê dikin nabe ku tenê weke zerarên aborî yan jî teknîkî bêne dîtin, yekser dibin sedema binpêkirina mafên mirovan.
Yek ji sernavên ku tê payin di rojeva Neteweyên Yekbûyî de derkeve pêş parastina parêzvanên xak û hawirdorê ye. Li gelek herêmên cîhanê aktîvîstên ku daristanan, çem, qadên çandiniyê û qadên jiyanê diparêzin li gef, krîmînalîzasyon, binçavkirin, doz û êrişan re rû bi rû dimînin.
Tê payin ku rûniştina li Cenevreyê di çarçoveya mafên mirovan a li hemberî zextên li ser parêzvanên hawirdorê de bibe qada bangawaziyên nû yên hîn xurt.
Rûniştina 62’emîn a Konseya Mafên Mirovan a Neteweyên Yekbûyî wê careke din nîşan bide ku kkrîza hawirdorê ne tenê ekolojîk e, di heman demê de krîzeke civakî, aborî û polîtîk e.
