13’ê Nîsanê di çarçoveya lêpirsîna dosyaya Gulistan Dokuyê de 13 kes hatin binçavkirin. Yek ji wan jî kurê waliyê Dersimê yê deme Tuncay Sonel ê bi navê Mûstafa Turkay Sonel bû. Demekî dirêj bû bang dihat kirin ku walî Sonel ji peywirê were dûrxistin. Piştî lêpirsîna der heqê Sonel de hate destpêkirin, ji peywirê hate dûrxistin.
Serdozgeriya Komarê ya Dersimê diyar kir ku der heqê Sonel de gihiştine “gumana sûc” û ji Serdozgeriya Komarê ya Erzirome re muzekkere nivîsand. Der heqê Sonel de ji ber sûcê “tunekirin, veşartin û guherandina cihê delîlên sûc” lêpirsîn hate destpêkirin. Di nivîsê de hate destnîşankirin ku kurê Sonel ji sûcên “kuştina biqesdî”, “Êrişa zayendî” û “veşartin û tunekirina delîlên sûc” hatiye binçavkirin.
Di nivîsê de hate gotin ku gihiştine wê gumanê ku Sonel sûcê di xala 281/1-2 ya TCK’ê (tunekirin, veşartin û guherandina cihên delîlan) de hatiye destnîşankirin kiriye. Bi domdarî hate gotin ku li gorî xala 161/6. A CMK’a Hejmar 5271’ê, walî dema sûcekî şexsî dikin, ev sûc ji hêla Serdozgeriyên Komarê yên li bajarên Dadgeha Edliye ya Herêmê lê hene ve tê nirxandin û hate xwestin ku li gorî rewşa delîlên li ber dest, der heqê Sonel de kirariya pêwîst were kirin.
