Taziyeye ku bi pêşengiya Komeleya Yekitî, Çand, Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) li Eywana Dawetê ya Firatê ya li Taxa Akpınarê hatibû danîn, ji aliyê MEBYA-DER, Dayikên Aştiyê, rêxistinên civakî yên sivîl û nûnerên partiyên siyasî û gelek welatiyan ve hat ziyaretkirin.
Girseya ku ber bi qada taziyeyê ve meşiya, dirûşmên “Şehîd namirin” û “Rêya şehîd rêya me, Apo ye Serokê me” berz kirin.
Li qadê wêneyên Rêber Apo û pankartên bi nivîsên “Şehîd namirin”, “Şehîdên me rûmeta me ne” û “Şehîd ronahiya rêya me ne” cih girtin. Wêneyên şehîdan jî li ser masaya sersaxiyê hatin danîn.
Hevserokê MEBYA-DER’ê Ramazan Dengîz ku di taziyeyê de axivî, diyar kir ku tevlîbûna girseyî ya ji bo bîranîna şehîdan salên 1990’î tîne bîra wî.
Dengîz, anî ziman ku gel xwedî li nirxên xwe derdikeve û got: “Yên ku di salên 90’î de beşdar bûn, erkek mezin bi cih anîn. Karekî mezin biser xistin.”
Dengîz, diyar kir ku mîrata herî mezin a şehîdan fedakarî û sekna wan e û got: “Em ê xwedî li mîrateya wan derkevin. Serkeftina vê pêvajoyê bi xwedîderketina li şehîdan pêkan e. Ez bawer dikim ku heke em xwedî derkevin û civaka xwe rêxistin bikin, em ê biser bikevin.”
