Platforma Demokrasî û Kedê ya Dersimê pêşengî ji bîranînê re kir û endamên Komeleyên Elewiyan ên Demokratîk (DAD), DEM Partî, Partiya Sosyalîst a Bindestan (ESP), Komeleya Pîr Sûltan Abdal, nûnerên gelek saziyan û şêniyên herêmê tevlî bûn.
Meşa ku ji Kolana Hunerê destpê kir li Qada Seyîd Riza bi dawî bû. Beşdaran posterên Seyîd Riza û pankartên reş hildan. Li qadê di daxuyaniyê de hate bibîrxistin ku di sala 1938’an de bi deh hezaran kes hatin qetilkirin, bi hezaran kes bi zorê hatin koçberkirin û bi sedan zarok jî hatin windakirin. Hate ragihandin ku piştî komkujiyê asîmîlasyona çandê hate kûrkirin û êrîşên giran li ser avahiya baweriyê ya Elewiyan dewam kir.
Serokê Federasyona Komeleyên Dersimê (DEDEF) Alîriza Bîlîr anîz iman ku Tertele ji qirkirina fîzîkî wêdetir pêvajoyeke jihevxistina bawerî û civakî da destpêkirin û xwest, cihê gorên qurbaniyan bêne diyarkirin û bi dîrokê re rû bi rûbûn bê kirin.
Serokê Komeleya Pîr Sûltan Abdal Cûma Erçe jî anî ziman ku rûbirûnebûna li dîrokî astengiya herî mezin a li pêşiya demokrasiya li Tirkiyeyê ye.
Serokê Bajêr ê EMEP’ê Ergîn Tekîn û endamê Desteya Rêveberiya Navendî ya ESP’ê Orhan Çelebî jî xwest berpirsyarên komkujiyê bêne darizandin.
Hevberdevka Komîsyona Bawerî û Gelan a DEM Partiyê Yuksel Mûtlû jî Terteleya Dersimê weke ‘Qirkirinê’ pênase kir û got, heta ku hesabê qirkirinê neyê dayin li Tirkiyeyê qala demokrasiyê nikare bê kirin.
Hevserokê Giştî yê DAD’ê Zeynel Kete jî destnîşan kir ku eşkerenekirina cihê goran tê wateya bêarhiştina Elewiyan ji cihên ziyaretê yên pîroz û anî ziman ku ew vê êrîşa li ser bîra civakî, çand û baweriyê qebûl nakin.
