Bernie Sanders ê 83 salî weke serbixwe di koma demokrat de cih digire. Bernie Sanders li hemberî rêveberên milyarder dest ji têkoşîna xwe bernade.
Mîna Nebraska, Colorado, Arizona û Nevadayê li gelek cihan Sanders li dijî milyarderê komarparêz Donald Trump, kesên dijberê Trump dikişîne aliyê xwe.
Sosyalîstê herî navdar ê DYE’yê roja Şemiyê li Los Angelesê bi deh hezaran kesî re civiya û nîşan da ku ew yek ji muxalîfên kêmdîtî yê li hemberî jinûve vegera Donald Trump a li Qesra Spî ye.
Senatorê Vermontê Sanders got, “Em nêzî 36 hezar kesî ne, ev civîna me ya herî mezin a heta niha ye.” Sanders diyar kir ku vê qelebalixiyê mîtîngên ku salên 2016 û 2020’an ji bo namzetiya serokatiya demokratan pêk anî, derbas kiriye.
Sanders ev tişt jî got: “Îro heyîna me ya li vir Donald Trump û Elon Musk pir ditirsîne!”
Siyasetmedarê serbixwe yê ku ti carî nebûye endamê Partiya Demokrat, di nava du mehên dawî de bi tûra “têkoşîna li dijî olîgarşiyê” qelebalixan dikişîne aliyê xwe.
Çalakvanan Parka Gloria Molina ya li Los Angeles’ê tejî kirin. Stranbêj Neil Young bi gîtara xwe ya elektronîk û bi dirûşmeya ‘Emerîkayê paşde bigire!’ piştgirî da çalakvanan.
Di çalakiyê de çalakvan li dijî rabûna rêveberiya Trump a li hemberî mafê xakê, qutbûnên mezin ên li hikûmeta federal kirî û gefên wî yên li ser sîgortaya lêkolîn û tenduristiyê ya ji bo xizanan, bi hêrs bûn.
Lê belê herî zêde jî hêrs li dijî Elon Musk hebû.
Hin ji kesên ku bi hêza milyarderê ji Efrîqaya Başûr û patronê Tesla û X’ê Musk re rû bi rû mane, Bernie Sanders weke kahînekî ku kehanetên wî pêk tên dibînin.
Sanders got, “Em di demeke welê de dijîn ku hin milyarder jiyana siyasî û ekonomîk a welatê me kontrol dikin.” Sanders difikire ku rêveberiya Trump Emerîkayê ‘bi lez ber bi civakek otorîter ve dibe’.
Di demeke ku popularîteya partiya demokrat di anketan de li gorî berê di asta herî ketî de ye de, Bernie Sander bi taybetî hêvî dike ku namzetên nû yên serbixwe bêyî etîketên demokrat teşvîqî hilbijartinê bike.
Senatorê ku nafikire di hilbijartinên 2028’an de ji bo serokatiyê bibe namzet, bi Alexandria Ocasio-Cortez re ye ku di nava çepgiriya pêşverû de li pêş e.
