Li Enqere, Stenbol û Îzmîrê ji bo jinên girtî yên nexweş çalakî hatin lidar xistin

Komeleya Mafên Mirovan (ÎHD) a Şaxa Îzmîrê ji bo balê bikişîne ser rewşa girtiyên nexweş li ber Sûmerbanka kevn a Konakê daxuyaniyek da çapemeniyê. Di çalakiyê de pankartên bi nivîsa “Girtiyên nexweş dimirin, bêdeng nemînin, nebin şirîkê sûcê” û “Jin aştiyê dixwazin” hatin vekirin. Bi wesîleya 8’ê Adarê, bi taybet rewşa girtiyên jin ên nexweş hate nirxandin.
Hevseroka Şaxa ÎHD’ê ya Îzmîrê Zîlan Gumuş, diyar kir ku jiyana girtiyên jin her tim di bin kontrolê de ye û destnîşan kir ku mafê tenduristî û jiyanê yên girtiyên jin ên nexweş ji destê wan tê girtin. Zîlan Gumuş, anî ziman ku divê girtiyên nexweş ên li girtîgehên Tirkiyeyê bi lezgînî û mayînde bên dermankirin û got, divê înfazên girtiyên nexweş ên di şert û mercên girtîgehê de nikarin bên dermankirin, tavilê bên rawestandin.
Parêzerên Komeleya Hiqûqnasên ji bo Azadiyê (OHD) Şaxa Îzmîrê, têkildarî binpêkirinên mafan ên li dijî girtiyên jin ên li girtîgehên Herêma Egeyê, li avahiya komeleyê daxuyanî da. Rêvebera OHD’ê Hanim Çelîk, li vir axivî û diyar kir ku girtiyên jin rastî cudakariya zayendî tên û got, “Azadiya jinê azadiya civakê ye.” Hanim Çelîk, anî ziman ku divê li girtîgehan şert û mercên jiyanê yên li gorî rûmeta mirovan bên sazkirin û xwest têkiliya jinan û mafên civakî neyên astengkirin.
ENQERE
Înîsiyatîfa Ji Girtiyên Nexweş re Azadî ya li Enqereyê, di hefteya 548’an de ji bo balê bikşîne ser girtiyên nexweş, bi taybet bi wesîleya 8’ê Adarê Roja Jinên Kedkar ên Cîhanê bal kişand ser rewşa girtiyên jin ên nexweş. 
Endama ÎHD’ê Sevîl Turgut di daxuyaniya çapemeniyê ya li Kolana Sakaryayê de der barê 32 girtiyên jin ên li girtîgehên Herêma Anatoliya Navîn de agahî parve kir.
STENBOL
Komîsyona Girtîgehan a Şaxa ÎHD’ê ya Stenbolê çalakiya 676’emîn a “Rûniştina F” ya ku her hefte lidar dixe, li ber avahiya komeleyê ya navçeya Beyoglû lidar xist. Bi wesîleya 8’ê Adarê pirsgirêkên tenduristiyê yên girtiyên jin ên li girtîgehên Herêma Marmarayê hatin nirxandin. Di çalakiyê de pankartên “Dermankirin maf e, nayê astengkirin” û “Divê jinên girtî yên nexweş bên berdan” hatin vekirin û dirûşmên “Bila girtiyên nexweş serbest bên berdan”, “Tecrîd dikuje, hevgirtin jiyan e” û “Bijî 8’ê Adarê” gelek caran hatin berzkirin. 
Endamê Desteya Rêveber a ÎHD’ê Nîmet Tanrikûlû, diyar kir ku li girtîgehan 17 hezar û 418 girtiyên jin hene û 759 zarokên di navbera 0-6 salî de bi dayikên xwe re li girtîgehê mezin bûne. Meral Nergîs Şahîn jî behsa pirsgirêkên tenduristiyê yên girtiyên jin kir û bal kişand ser zehmetiyên girtiyên li Girtîgeha Jinan a Bakirkoyê.