Êrîş, li gorî saeta xwecihî di 12.39’an de li herêma Kaşehriyê li qada ofîseke aîdî hikûmetê pêk hat. Wezîrê Karên Hundirîn Mohsin Naqvi li cihê bûyerê daxuyaniyek da û piştrast kir ku êrîş çalakiyeke xwekuştinê ye. Li gorî rayedaran herî kêm 12 kesan jiyana xwe ji dest dane û 27 kes jî birîndar bûne.
Piştî teqînê herêm, bi temamî ji aliyê hêzên ewlehiyê ve hate dorpêçkirin. Îslamabad, li gorî bajarên din ên welêt weke bajarê ewletir dihat qebûlkirin; li bajêr herî dawiyê di Kanûna 2022’yan de êrîşek pêk hatibû.
Pakistan, di serdemên dawîn de bi taybetî jî li ser xeta sînor a Efxanistanê li gel zêdebûna êrîşan bi gefa ewlehiyê re rû bi rû ye. Wezîrê Karên Hundirîn Mohsin Naqvi da zanîn ku êrîş piştî êrîşa li herêma Heyber Pahtunva ya li ser sînorê Efxanistanê pêk hatiye ku di encama êrîşê de sê kesan jiyana xwe ji dest dabûn.
Wezîrî da zanîn ku kesê ku êrîş pêk aniye welatiyê Efxanistanê ye û got ku bi awayekî rasterast rola Efxanistanê di van êrîşan de heye.
Hefteya borî di navbera Pakistan û Efxanista ku di bin rêveberiya Talîbanê de li serxeta sînor şer û pevçûnên dijwar rû dabûn, li gorî daneyên Neteweyên Yekbûyî (NY) 70 kesî ku piraniya wan sivîl in, jiyana xwe ji dest dane. Agirbestê di navbera her du welatan de jî hê lawaz e û di encama hevdîtinan de tu pêşketin nayê bidestxistin.
Her wiha tê ragihandin ku rageşiya li gel Hindistana cînarê din ê Pakistanê yê li ser sînor jî zêde ye. Hate ragihandin ku di encama teqîneke roja Duşemê ya li bajarê Delhiya Nû yê Hindistanê de heşt kesan jiyana xwe ji dest dane.
Serokwezîrê Hindistanê Narendra Modi bûyer weke ‘’encama komployê’’ pênase kir û sedema teqînê hê bi awayekî fermî nehatiye eşkerekirin.
Li Pakistanê lêpirsîna têkildarî teqînê berdewam dike. Rayedaran dan zanîn ku ew ê tedbîrên ewlehiyê zêde bikin.
