Rêxistina Mafê Mirova HRANA’yê têkildarî qetilkirina du jinan a li Rojhilatê Kurdistan û Îranê agahî da.
Hate ragihandin ku Pênceşema borî cenazeyê jineke 50 salî bi navê Letîfe Mihemedzade li nêzîkî Gudnê Qerenaw a ser bi bajarê Saqiz ji aliyê hêzên polîsan ve hate dîtin. Piştî lêkolînên destpêkê di encama lêkolîna polîsan de derket holê ku ev jin ji aliyê hevjînê xwe yê destpêkê ve hatiye xeniqandin û piştre jî kêr kiriye.
Di dewamê de hate gotin ku roja borî mêrek li bajarê Çaphar a dikeve sînorê Parêzgeha Sîstan û Belûcista hevjîna xwe ya temen 24 salî ya bi navê Azîta Rehmetzehî qetil dike. Ev jin yek ji karmendên dermanxaneyeke Cibhar kar dikir. Tenê 12 rojan piştî hevjiniyê ji aliyê hevjînê xwe ve bi guleyê hate qetilkirin.
Hêjayî bibîr xistinê ye li gorî raporên saziyê sala 2025’an herî kêm 63 dosyayên destdirêjî- destavêtinê, 110 bûyerên qetilkirina jinan, 11 dosyayên kuştina bi navê namûsê, dosyayek xweşewitandin, 11 dosyayên lêdan û tundî, dîsa bi kêmanî 179 dosyayên tundiya malê û 8 dosyayên şewitandina bi tîzavê hatine tomarkirin.
