Li bajarê Zurich ê Swîsreyê bi hezaran kes di Festîvala Çanda Kurd a Swîsreyê ya 1’emîn de li hev kom bûn. Festîvala ku yekemcar li Swîsreyê hate lidarxistin, danê nîvro destpê kir û heta şevê dewam kir. Bi pêşengiya Civaka Demokratîk a Kurd li Swîsreyê (CDK-S) û Yekîtiya Jinên Kurd a Swîsreyê (YJK-S) bi dirûşma ‘Bi ruhê 15’ê Tebaxê em civaka demokratîk ava dikin’ hate lidarxistin. Peyamên li ser azadiya fîzîkî ya Rêber Apo mohra xwe li festîvalê xist.
Festîval li Hardturm Arealê pêk hat û bi hezaran Kurdistanî li gel dostên xwe beşdar bûn. Destpêkê ji bo bîranîna şehîdên şoreşê deqeyek rêz hate girtin û sirûda ‘Ey Reqîb’ hate xwendin.
Hevserokên CDK-S Dîlan Çetînkaya û Cemal Ozdemîr silav dan gel. Hevserokan anîn ziman ku festîvala îsal cara yekemîn pêk tê bi ruhê 15’ê Tebaxê pêk tê û şehîdên têkoşîna azadiyê ya Kurdistanê bi hurmet û minet bi bîr anîn. Dîlan Çetînkaya destnîşan kir ku ew bi Rêber Apo re ne û got, “Em ê vê têkoşînê heta dawiyê bimeşînin. Çand, huner û zimanê Kurd di meşa ber bi paşeroja azad de hêmaneke girîng e. Ji bo serketina pêvajoya ku Rêber Apo da destpêkirin, em ê ji her demê bêhtir bi xurtî têbikoşin.”
Hevserokê CDK-S’ê Cemal Ozdemîr jî got, “Em îro li vê derê vê festîvalê bi ruhê 15’ê Tebaxê pîroz dikin. Beriya 50 salan kesî qala Kurdan nedikirin, beriya 50 salan ziman, çanda Kurdan qedexe bû, lê îro li Zurich a Swîsreyê em festîvala çanda Kurd pîroz dikin. Têkoşîna hate meşandin têkoşîneke ji 50 salan e. Em ê bi her awayî bi Rêber Apo û têkoşîna şehîdên xwe re bin, em ê li qadan bin. Em ê pêvajoya aştî û civaka demokratîk bi ser bixînin.”
‘HETA KU RÊBER APO AZAD NEBE PÊVAJO BI PÊŞ VE NAÇE’
Hevseroka KCDK-E’yê Zubeyde Zumrut jî li festîvalê axivî. Zubeyde Zumrut bal kişand ser banga 27’ê Sibatê ya Rêber Apo û destnîşan kir ku heta Rêber Apo azad nebe, pêvajo nikare bi pêş ve biçe. Zubeyde Zumrut got, “Em weke gelê Kurd bi salan e têdikoşin. 15’ê Tebaxê ji bo me demeke dîrokî ye. Ez li we hemûyan pîroz dikim. Hûn bi salan e vî karî dimeşînin.
Zubeyde Zumrut anî ziman ku 50 salan wan berdêlên giran dan û got, “Niha jî berdêla xwe çi dibe bila bibe em ê li pişt banga Rêber Apo bin. Em ê heta dawiyê li pişt aştiyeke mayinde û civaka demokratîk bin. Em di pêvajoyeke girand e ne. Li hemberî yên ku ziman û nasnameya me qebûl nakin, em ê têkoşînê dewam bikin.”
Hevberdevkê Komîteya ‘Azadî ji Abdullah Ocalan re ya Swîsreyê’ Dr. Peppe Savary ku çalakiya şewitandina çekan a hêzên gerîla şopand, got “Bi pêşengiya fermandar Besê Hozat 15 gerîlayên mêr, 15 jî gerîlayên jin çekên xwe şewitandin û peyameke girîng dan. Em dişopînin bê dewleta Tirk û Erdogan wê bi çi rengî nêzî vê bibin. Em hêvîdar in ku dewleta Tirk jî gavê biavêje.” Savary axaftina xwe bi dirûşma ‘Jin, Jiyan, Azadî’ bi dawî kir.
Bi navê Tevgera Jinên Kurd Şukran Sîncar jî ragihand ku jinên Kurd li pişt pêvajoya Rêber Apo ne û got, “Ev pêvajo girîng e. Ji bo pêkanîna vê banga Rêber Apo em ê hîn bêhtir têbikoşin.”
Siyasetmedarê Kurd Selahattîn Soro jî got, “Em sala 41’ê ya 15’ê Tebaxê diqedînin û derbasî sala 42’an bûn. Di serî de li fermandar Egîd, Zîlan, Bêrîtan û fermandarê hemû fermandaran li Rêber Apo pîroz dikin. Cejna we pîroz be. Pêngava 15’ê Tebaxê li hemberî wê zîhniyetê hate kirin ku Kurd tine dihesiband.
Ji bo banga 27’ê Sibatê ya Rêber Apo bi ser bê xistin, wezîfeyên mezin dikevin ser milê gelê me yê li Ewropayê. Ji xwe bi salan e hûn fedakariyeke cidî dikin. Lê belê karê me hîn neqediya ye. Heta ku dîwarên Îmraliyê hilweşin, ciwanên me yên li serê çiyê bi rengekî azad karibin siyasetê bikin, divê em berpirsyariya xwe bi cih bînin.”
‘ABDULLAH OCALAN RÊYA SIYASETA DEMOKRATÎK VEDIKE’
Siyasetmedar Sabahat Tûncel jî got, “Birêz Ocalan dibêje, manîfestoya nû bi qasî manîfestoya Rêya Şoreşa Kurdistanê girîng e. Heval zanin, Rêya Şoreşa Kurdistanê beriya 52 salan hatibû amadekirin. Kurdistana sosyalîst a yekbûyî ya serbixwe bû û rêbaza vê ya têkoşînê jî çekdarî bû. Birêz Ocalan îro vê stratejiyê diguherîne. Bi perspektîfa azadiya demokratîk a pirsgirêka azadiyê ya gelê Kurd jinûve ava dike. Çekan ji dewrê derdixîne û rêya siyaseta demokratîk vedike.”
Di bernameya çandî ya festîvalê de jî Kolektîfa Muzîkê ya ser bi Meclîsa Mehmet Tûnç a Aaraû derkete ser dikê. Piştre Delîl Tofan, Govenda Swîsreyê, Şengul Astan, Lawje (Alî Tekbaş), Rojda û herî dawî jî DJ Qoser hunera xwe pêşkêş kirin.
Festîval heta derengiya şevê bi gerandina govendê dewam kir.
