Piştî 26 salan yekem car Rêber Apo bi dîmen li ser ekranan bangeke dîrokî kir. Banga Rêber Apo roja 9’ê Tîrmehê di ANF’ê de hate weşandin. Gelên Bakur û Rojhilatê Sûriyeyê bi salane bi hesret û mereqeke mezin li benda vê rojê bûn. Malbatên Şehîdan li ser dîtina Rêber Apo hestên xwe anîn ziman.
‘EM LI BENDA DÎTINA SEROKÊ XWE BÛN’
Di despêkê Şaziya Îbrahîm a ku dayika şehîd Elî û şehîd Bîrhat e û gelek caran Rêber Apo dîtiye, ev tişt anî ziman: ”Em wekî dayikên şehîdan bi salan e bi hêviyeke pir mezin li benda vê kêliyê bûn ku Serokê xwe li ser ekranên televizyonê bibînin. Di 27 salan de nêzî sê caran wêneyên Rêber Apo ji Îmralî derketin, di nav wan caran de me li ser wêneyan rewşa Rêber Apo tahlîl dikir, lê vê carê dîtina dîmenê Rêber Apo ji bo me jiyanek nû ye.”
‘AXAFTINA RÊBER APO JI BO ME PERSPEKTÎF E’
Şaziya Îbrahîm di axaftina xwe diyar kir ku axaftina Rêber Apo ji bo gelê Kurd perspektîf e û wiha domand: ”Rêber Apo di axaftina xwe de got ku ti carî ez bi azadiya xwe nefikirîme, azadiya min bi azadiya gel re ye. Me wek gel ji berê de got eger Rêber Apo azad nebe, em jî azad nabin. Ev jî tê wateya ku axaftina Rêber Apo û axaftina gel yek e û kesek nikare gel û Rêber Apo ji hev qut bike. Em careke din diyar dikin ku axaftina Rêber Apo ji bo me perspektîf e.”
Birayê şehîd Hemîd, Nûrî Ehmed jî hestên xwe bi dîtina Rêber Apo re parve kir û wiha got: ” 27 sal derbas dibin, lê dema me li Rêber Apo di dîmenan de mêze kir, hîn jî ew xeta rast, bawerî û xeta mirovî di rûyê wî de diyar e. Bi xwe re cîhanê hemû hembêz dike û ev jî ji bewariya bi gelê xwe re tê. Berî ku em dîmenên Rêber Apo li ser ekranan bibînin, her dihate gotin ku wê Rêber Apo li ser televizyonan derkeve, em jî bi wê heviya mezin li bendê bûn. Piştî ewqas sal cara yekem e ku dîmenek Rêber Apo derdikeve ev ji bo me wateyek pir mezin bû.”
‘DIVÊ EM XWEDÎ LI KEDA RÊBER APO DERKEVIN’
Dayika şehîd Memo, Rebîe Qewas anî ziman ku wê ji deng û dîmenê Rêber Apo moralek mezin girtiye û wiha got: ”Ji duh ve em gelek bi moral û kefxweşin ji ber ku piştî ewqas sal me deng û dîmenê Rêber Apo dît. Dema ku me rewşa Rêber Apo dît û me moral û hêza wî dît me jî moral û hêzeke pir xurt ji Serokê xwe girt. Divê ji vir û şûnde li ser wê esasê em xebata xwe pêş bixin. Rêber Apo ji bo gelê xwe di Îmraliyê de bi salan e li ber xwe dide, ji bo wê divê em jî li gorî vê yekê bixebitin û xwedî li keda Rêber Apo derkevin.”
