Fermandarê Giştî yê QSD’ê Mazlûm Ebdî bi rêya Zoomê beşdarî civîna çapemeniyê ya ji aliyê Hêzên Sûriyeya Demokratîk (QSD) ve li Koma Çapemeniya Neteweyî ya li Washingtonê bû û têkildarî rewşa Sûriye, Bakur û Rojhilatê Sûriyeyê û banga Rêber Apo ya dîrokî axivî.
Ebdî têkildarî banga dîrokî ev yek anîn ziman: “Banga Birêz Ocalan ji bo PKK’ê û gerîlayên PKK’ê ye. Rasterast ne ji bo herêma bû. Peyama ku ji Başûrê Kurdistanê û deverên din re şandî, ji bo me jî şand.”
Ebdî diyar kir ku peyama Rêber Apo banga aştiyê û geşedaneke erênî ye û got ku ger were sepandin dê demokrasiya Tirkiyeyê zêdetir pêş bikeve.
Fermandarê Giştî yê QSD’ê Mazlûm Ebdî wiha dewam kir: “Ger di navbera PKK û Tirkiyeyê de aşitiyek pêk were, dê ev yek bandoreke erênî li herêma me jî bike. Ger ev pêvajo ser bikeve dê bandoreke erênî li me jî bike û dê tu hincetên Tirkiyeyê nemînin ku êrîşî herêmên me bike.’’
