Rêxistina Nûdem ji bo perwerdekirina kesên astengdar beşdarî 10’emîn Mihrîcana Huner û Wêjeyê ya Jinê ya li bajarê Qamişlo bûn. Di mihrîcanê de gulên ku kesên astengdar bi destên xwe çandine wek beşekê li mihrîcanê hatin pêşkêşkirin.
Di vê çarçoveyê de yek ji Rêveberiya Rêxistina Nûdem Davîn Mehmûd û ciwana 14 salî ya astengdar Rehma El Hisên ji ajansa me re wiha behsa kêfxweşiya tevlîbûna xwe ya ji mihrîcanê re kirin.
‘BI ÇANDINA GULAN EM DIKARIN HESTÊN ASTENGDARAN PÊŞ BIXÎNIN’
Davîn Mehmûd di destpêka axaftina xwe de ev tişt anî ser ziman: “Em wek Rêxistina Nûdem di vê mihrîcanê de bi kulîlkên ku bi destê astengdaran hatine çandin beşdar bûne. Dema em tevlî vê mihrîcanê bûn ji bo ku her kes bizanibe kesên astengdar jî dikarin gelek xebatan bikin, ev mihrîcan ji bo me bû gavek ku karê astengdaran ji civakê re bidin xuyakirin. Yek ji beşên Rêxistina Nûdem bi çandina daran û kulîlkan mijûl dibe. Em van zarokên astengdar tînin vê beşê da ku bikaribin bi mezinkirina gul û daran hestê xwe derxînin û pêş bixînin. Bi rastî jî dema em vê yekê ji bo astengdaran dikin em pir kêfxweş dibin û ew jî pir kêfxweş dibin. Ji ber ku kulîlk bi destên wan tên mezinkirin.”
‘ARMANC EW BÛ KU ASTENGDAR PÊŞ BIKEVIN’
Davîn Mehmûd di berdewamiya axaftina xwe de got ku kulîlkên bi destê van zarokên astengdar hatibûn çandin bi kêfxweşî me li mihrîcanê pêşkêş kir û wiha pêde çû: “Di vê mihrîcanê de du hevalên me yên astengdar amade bûn û kulîlkên xwe bi kêfxweşî pêşkêşî gel kirin. Armanca me ji tevlîbûna mihrîcanê re ku hîn bêhtir kesên astengdar pêş bikevin û ji gel piştgirtiyê bigrin. Em bi hêvî ne çi kesên ku xwe di pêşxistinê de lawaz dibîne, bila pêş bikeve û tiştek li beramberî hezkirina wan di jiyanê re nebe asteng.”
‘JI BO MIN ÇANDINA GULAN AVAKIRINA JIYANEK NÛ YE’
Her wiha zaroka astengdar a bi navê Rehma El Hisên bi gulên xwe yên ku bi seatan li ber wane û wan av dide da ku mezin bibe û jiyanê bixemilînin, tevlî 10‘emîn Mîhrîcana Huner û Wêjeyê ya Jinê bûye. Rehma El Hisên hestên xwe wiha bi me re parve kir û got: “Ez bi perwerdeya Rêxistina Nûdem pir kêfxweş im ji ber ku ez bi çandina daran û kulîlkan pir kêfxweş dibim. Çandina dar û gulan ji bo min avakirina jiyanek nûye. Her wiha bi piştgiriya mamosteyên me yên li Rêxistina Nûdem em tevlî vê mihrîcanê bûn.”
Rehma El Hisên wiha hêviya xwe anî ziman û dawî li axaftina xwe anî: “Hêviya min ew e ku kesên van gulan bibin wek me guhdariya wan bikin. Ji ber ku gul jî zindiyeke û nabe em wan qut bikin. Bi taybet em jin hezkirina me ji bo gulan pir mezin e.”
