Endama Koordînasyona TAJÊ Neam Bedel ji ANF’ê re axivî û got, ‘’Şerê ku li Helebê hatî kirin derveyî exlaqê mirovahiyê bû, her kesî û di serî de civaka navnetewî çavên xwe ji hovîtiya HTŞ’ê û delweta Tirk re girtin. HTŞ’ê bi zihniyeta DAÎŞ’ê şer li hemberî Kurdan û taxên wan meşand. Ya ku sala 2014’an bi serê Şengalê hatî bi serê taxên Helebê de jî anîn.
Plana ku li ser taxên Helebê hatî kirin, planeke navnetewî bû û serkêşê wê jî dewleta Tirk a dagirker û Emerîka bûn. Her kes Colanî û hikûmeta nû ya Sûriyê nas dike. Bi salan di nava çeteyên DAÎŞ’ê de cih girtin, îro Emerîka bi fermî ew kiriye serokê dewletê. Ev yek xeteriya li ser gelan û kêmnetewan zêde dike, çawa xwestin Elewiyan û Durziyan qir bikin niha jî dixwazin Kurdan qir bikin û tola şkestina DAÎŞ’ê ji Kurdan hilînin.’’
‘ÊŞA ME Û ROJAVA YEK E’
Neam Bedel ev tişt jî anî ziman, “Colanî bi desteka dewleta Tirk dixwaze tevahiya Rojava dagir bike û gelê li heremê koçber bike û ji axa wan dûr bike. Ev planeke demdirêj e. Lê di taxên Helebê de hate diyarkirin ku gelê Kurd û civaka wê ti carî li hember vê hovîtiyê çok natewîne û teslîmiyetê qebûl nake, gelê Şêxmeqsûd û Eşrefiyê ev yek da îsbatkirin. Em weka civaka Êzidî ya Şengalê di her şert û mercî de bi xelkê Rojava re ne.”
