Siyasetmedarê Kurd Hişyar Ozsoy bûyerên dawî yên li ser pirsgirêka Kurd nirxand û got, “Bi banga Birêz Abdullah Ocalan re biryara dîrokî ya PKK’ê ya li ser fesixkirina xwe û bidawîkirina têkoşîna çekdarî, hêviya çareserî û aştiyê careke din xist rojeva herêmê.”
Hişyar Ozsoy destnîşan kir ku pêşketinên dîplomatîk û leşkerî yên li Rojava ne tenê li herêmekê ne, her wiha bandorê li tevahiya siyaseta Kurd û Sûriyeyê dike.
Ozsoy destnîşan kir ku pirsgirêkên Rojava û Bakur êdî ketine nava hev û got, “Dewleta Tirk di mijara zemîna danûstandina li ser meseleya Kurd de xitimî ye. Nîqaş li ser avakirina siyaseteke nû dike. Em di demeke welê de ne ku rola Birêz Ocalan hîn bêhtir girîng dibe. Bûyerên dawî ne tenê eleqeya xwe bi Sûriyeyê re hene; berevajî vê yekê tabloyeke polîtîk û leşkerî diafirîne ku dikare bandorê li ser tevahiya siyaseta Sûriyeyê bike.
Meseleyên Rojava û Bakurê Kurdistanê ketine nava hev. Ji ber vê yekê em di demeke welê de ne ku pirsgirêkên ji parçeyên Kurdistanê li gel hev dikarin bêne nirxandin. Îro komxebateke ji du rojan tê lidarxistin ku mirovên ji herêmên cuda yên Kurdistanê tevlî dibin. Di civînê de rewşa Kurdistanê, tifaqa neteweyî ya bi pêvajoya Rojava û Bakur re tê nîqaşkirin.”
Ozsoy got, “Li Tirkiyeyê serdemeke tevlîhev heye. Di vê pêvajoyê de ku hîn nav an jî pênaseyeke şênber lê nehatiye kirin, hêviyên li ser bidawîbûna tundiyê û serweriya siyaseta demokratîk geş dike” û bi bîr xist ku di vê mijarê de Rêber Apo bi înîsiyatîf rabûye. Ozsoy got, “Biryara bidawîkirina têkoşîna çekdarî ku di kongreya PKK’ê de hate wergirtin, wê berpirsyariyê dide dewletê ku di vê mijarê de çarçoveyeke siyasî û hiqûqî ava bike.”
Hişyar Ozsoy anî ziman ku ev gav li nava raya giştî ya Tirkiye û navneteweyî bi erênî hate pêşwazîkirin û got, “Lê belê hikumetê heta niha gavên cidî neavêtiye ku baweriyê bide raya giştî. Li girtîgehan hin guhertinên di qanûnên înfazê de têne hêvîkirin, lê belê ev yek hîn di asta afirandina baweriya hiqûqî de nîne.”
Ozsoy neguhertina şert û mercên kar û azadiya Rêber Apo jî bi hewldana desthilatdariya siyasî ya mijûlkirina pêvajoyê ve girê da û got, “Kurd di wê pozîsyonê de ne ku ji danûstandinê re amade ne. Lê belê aliyê dewletê bi rengekî şermok, mijûlkirin û tasfiyekar nêzîk dibe. Halbûkî Kurdan bi partiyên xwe, bi gel, şaredarî û xelkê xwe yê li dîasporayê konsepteke hevpar ava kiriye. Niha divê qadek bê afirandin û siyaset ji bo çareseriya bi axaftinê, atmosfereke danûstandinê biafirîne.”
Hİşyar Ozsoy destnîşan kir ku ji bo pêvajo bi ser bikeve divê dewlet îradeyeke ji dil nîşan bide û got, “Kurd ji danûstandinê re amade ne, bi biryareke dîrokî dawî li têkoşîna çekdarî tînin. Divê dewlet bersivê bide vê bangê. Çend guherînên bi wate û çend gavên qanûnî yên şênber wê hêviyê ji nû ve geş bike. Naxwe ev jî wê bibe hêviyek ku di ber mirovan de maye.”
