Komîteya Ekolojiyê ya PJAK’ê li ser wan şewatên ku van demên dawî li çêregeh û daristanên bajarên wekî Ciwanro û Paweyê derdikevin, daxuyaniyek belav kir. Di daxuyaniyê de bal hate kişandin ku li ser derketina şewatan guman hene û ji bo şewatan banga hestyariyê hate kirin.
Daxuyaniya Komîteya Ekolojiyê ya PJAK’ê wiha ye:
“Li gel nêzîkbûna demsala havînê, careke din daristan û çêregehên rojhilatê Kurdistanê yên cuda cuda rastî şewatê tên ku hin dest li pişt wan hene. Lewma xwerêxistinkirina gel a ji bo kontrolkirina van şewatan û parastina jîngehê bûye pêwîstî. Piraniya van şewatan ji ber nêrîna ewlehîxwaz a sîstema kavilkar a Îranê çêdibin û pêwîst e bi rêya helwestekê ku gel ji xwe re bingeh werdigire, em li dijî vê yekê tê bikoşin.
Ji 8’ê hezîranê ve zincîreyek şewat li çêregeh û daristanên Ciwanro û Paweyê rûdidin, lê belê sîstema Îranê ya dijekolojî di asta herî kêm de jî bala xwe nade van şewatan. Bi xêra saziyên sivîl ên jîngehparêz û çalakvanên jîngehê ev şewat hatine kontrolkirin. Dîyar e ku nêrîna ewlehîxwaz a rejîmê û hebûna destên veşartî di van şewatan de bi salan e sedemên van şewatan in. Şewatên rojên borî yên li daristanên Ciwanro û Paweyê jî ji ber van sedeman çêbûne û berdewam in. Ev siyaset û kiryarên rejîmê tenê bi wergirtina helwestê û bi çalakiyên bênavber ên hêza gel û çalakvanên jîngehê û her wiha bi berxwedana rewa ya saziyên jîngehê dê bê pûçkirin.
Komîteya Ekolojiyê ya Partiya Jiyana Azad a Kurdistanê (PJAK) van destên veşartî û bêdengiya saziyên fermî şermezar dike û daxwazê ji saziyên sivîl ên jîngehparêz, çalakvanên jîngehê û ji hemû çînên civakê dike ku ji bo kontrolkirin û vemirandina agiran hewl bidin. Di gel vê yekê, xwerêxistinkirina gel mafekî demokratîk e û divê zêdetir bê pêşvebirin. Pêwîst e gelê me rejîma ku bi xwe sedema jinavbirina jîngehê ye, tiştekî hêvî neke û bi xwe gavan biavêje. Ji ber ku serekîtirîn rê ji bo astengkirina wan sedemên ku li pişt şewatên daristan û çêregehan in, pêşvebirina xwerêxistinkirina gel a demokratîk û bihêzkirina yekîtiyê ye.”
