Piştî ku Gursel Tekîn ji bo Serokatiya Bajêr a Stenbolê ya CHP’ê weke qeyûm hate tayînkirin, nerazîbûn dewam dike. Li ber avahiya Stenbolê ya CHP’ê dorpêça polîsan û nobed dewam dike. Polîsan rêyên ber bi avahiya partiYê ve girtine. Serê sibehê jî bendên nû li pêşiya avahiyê hatin danîn. Di dema bicihkirina bendan de di navbera polîsan û gel de rageşiyê rû da. Parlamenterên CHP’ê ku li ber avahiyê ne, diyar kirin ku polîsên sivîl hewl dan bikevin hundir û bûne asteng.
Polîsan bi gaza îsotê êrîş birin ser gel. Kesekî 54 salî ji ser hişê xwe çû. Di dema êrîşa polîsan de herî kêm 10 kes hatin binçavkirin.
Li gel astengiyan jî gel berê xwe dide avahiya bajêr a CHP’ê.
Nûnerên gelek partiyên siyasî jî hatin qadê û li ber qeyûm rabûn.
EM Ê SIYASETA DEMOKRATÎK BIPARÊZIN
Serokê Giştî yê CHP’ê Ozgur Ozel li civîna Meclîsa Nûneran a Rêxistina CHP’ê axivî û got, “Li hemberî me desthilatdariyeke welê heye ku extiyar bûye, westiya ye, bêçare ye, bi kêrî welêt nayê, tiştekî xwe nemaye ku bide welêt. Gelek tişt ji vî welatî standin, lê belê tiştek nedan. Li Tirkiyeyê berjewendiyên Erdogan û berjewendiyên milet li hev nayê. Bi kursiyê ve zeliqî ye û ji bo jê ranebe amade ye ku welêt bide ber êgir. Îro li ser desthilatdariya wan gefa herî mezin CHP ye. Li Tirkiyeyê mixabin gef li ser siyaseta pir partiyî heye. Ji ber vê yekê êrîş li CHP’ê tê kirin. Weke eniyekê em ê siyaseta demokratîk biparêzin.”
