Ragihandina Jinên Êzidî bi wesîleya roja rojnamevaniya jinên Kurd daxuyaniyek nivîskî parve kir û di şexsê şoreşger, pêşeng û rojnamevan Gurbetellî Ersoz de tevahî şehîdên çapemeniya azad bi bîr anî.
Daxuyaniya RAJÊ wiha ye:
“Em roja rojnamevaniya jinên Kurd, li tevahî jinên azadîxwaz yên ku di rêya heqîqeta xwebûnê de li ber xwe didin, li Rêber Apo, li tevahî rojnamevanên jin ên ku di şopa Gurbetellî Ersoz de têkoşîna heqîqetê dimeşînin pîroz dikin. Di şexsê şoreşger, pêşeng û rojnamevana dildara azadiya jinê Gurbetellî Ersoz de em tevahî şehîdên çapemeniya azad bibîr tînin.
Di têkoşîna azadiya jinê de çapemeniya azad a jin bûye xwedî cihekî girîng. Roja rojnamevaniya jinên Kurd bi berdêlên giranbiha hate avakirin. Ji hevrê Gurbetellî bigre heta Deniz, Nûjiyan, Gulistan, Şaristan, Arjîn, Dilîşan, Dilovan, Jiyan, Avrîn û Cîhanan têkoşîneke bêhempa ya ji xweşikbûn û heqîqeta jinên azad ava bûye. Em weke jinên Êzidî heqîqeta van rêhevalan ji bona xwe dikin çavkaniya nasnameya rojnamevantiya azad a jin. Me îro rêxistiniya xwe, zanebûn û xebatên çapemeniya azad a jinê bi saya van şopdarên heqîqetê ava kiriye û em xwe tê de pêş dixin.
Çapemeniya azad a ku xwe li ser xeta hevrê Gurbetellî ava kirî, di fermana 3’yê Tebaxa 2014’an de li Şengalê kedekî mezin dan. Bi saya wê keda pîroz û fedekariya bêhempa bi dîmen, wêne û nûçeyan tarîtî û hovîtiya çeteyên DAIŞ’ê ji raya giştî re hate ragihandin. Di vê sedsalê de me wekî civak û bi taybetî jinên Êzidî qirkirina herî mezin dît û jiyan kir. Hîna jî berdêla vê jin bi jiyana xwe dide. Lê ev rastî û heqîqet bi rêya Ragihandina azad û kedkarên mîna Nûjiyan, Şaristan û bi dehan rojnamevanên weke wan hate ziman.
Weke Ragihandina azad a jinên Êzidî em daneheva çapemeniya azad a jinên Kurdistanê ji bo xwe dikin bingehê xwe rêxistin kirin û pêşxistinê. Bi vê bîr û baweriyê emê heta ku li hemberî ronahiyê tarîtî hebê di riya heqîqetê de bibin dengê şoreşa jinê û têkoşîna azadiyê ji hemû jinan re ragihînin. Em ê li ser xeta Gurbetellî Ersoz û Nujiyan Erhan bibin dengê têkoşîna jinên Êzidî. Careke din em roja rojnamevaniya jinên Kurdistanê li tevahî xebatkar û kedkarên jin ên çapemeniya azad pîroz dikin.”
