Têkildarî komkujiyên li perava Sûriyeyê têne kirin, Rêveberiya Xweseriya Demokratîk a Herêma Bakur û Rojhilatê Sûriyeyê daxuyaniyeke nivîskî da.
Di daxuyaniya Rêveberiya Xweser de ev gotin hatin kirin:
“Piştî hilweşandina rejîma Baas a desthilatdar gelê Sûriyê hêvî dike ku ji hemû cureyên tundî, kuştin û komkujiyên ku li dijî pêkhateyên wê dihatin kirin rizgar bibe û ji mezhebperestî û nijadperestiyê rizgar bibe.
Lê tiştên ku di rojên borî de li herêmên perava Sûriyeyê rû dan nexasim kuştin û komkujî, nîşan didin ku em ji zihniyeta desthilat rizgar nebûne.
Em Rêveberiya Xweseriya Demokratîk a Herêma Bakur û Rojhilatê Sûriyeyê van sûcên li dijî xelkê me yê li perava Sûriyeyê têne kirin, bi tundî şermezar dikin. Em diyar dikin ku ev kiryar me vedigerînin serdemeke tarî ku gelê Sûriyê naxwaze dubare bibe. Her wiha berdewamkirina van sûcan rê li pêşiya avakirina Sûriyeya siberojê, Sûriyeya ku bêyî mezhebperestî yan jî şovenîzmî têra tevahî xelkê wê dike, asteng digire.
Em bang dikin ku sûcdarên ev sûc kirine werin darizandin û divê komîteyên lêpirsînê jî bi awayekî zelal û aşkera tev bigerin ku rastiyên bûne diyar bikin û hesab bidin berpirsên sûcan.
Careke din em bang li hemû hêzên niştîmanî yên Sûriyeyê û gelê Sûriyeyî dikin ku bi hev re ji bo lidarxistina diyaloga niştîmanî bixebitin, da ku di avakirina Sûriyeya siberojê ya ji tevahî Sûriyeyiyan re bibe alîkar. Ji ber ku tenê bi vê rêyê em dikarin rê li pêş her kesên dixwazin Sûriyeyiyan qetil bikin û qir bikin, bigirin.”
