Girtiyên siyasî li dijî şert û mercên tecrîdê yên giran ên li girtîgehên Tîpa Bîrê ku mîna Tîpa F’ye ye, greva xwe ya birçîbûnê didomînin. Yek ji van girtiyên siyasî yê ku vê dawiyê hate berdan, Alî Hasan Akgul ji bo Serkan Onur Yilmaz, ku ji ber greva birçîbûnê di qonaxeke krîtîk de ye, bangek lezgîn kir û daxwaz kir ku hevrêyên wî ji GirtîgehaTîpa Bîrê ya Ewlehiya Bilind a Antalyayê bo girtîgehên din werin sewqkirin.
‘KÊLIYA KU MIROV GAV DAVÊJE TÎPA E YA HEJMAR 1 A SÎNCANÊ ZILM DESTPÊ DIKE’
Akgul, diyar kir ku piştî di Kanûna 2024’an de hate girtin, ew ji Girtîgeha Marmara ya Silivri bo Girtîgeha Bi Ewlekariya Bilind a Hejmar 1 a Sîncanê hatiye sirgûnkirin. Akgul, anî ziman ku li vir lêgerîna tazî li ser wan hatiye ferzkirin û got ku bi girtiyê nexweş Ufuk Keskîn re di hucreyek sê kesan de hatine girtin.
‘NE TENÊ RÛYÊ MIROVAN HER TIŞTEKE XWEZAYÎ JÎ QEDEXE DIKIN!’
Akgul, da zanîn ku girtîgehên mîna bîrê sê qat in, qada hewadarkirinê 7-8 gav in û hucreyên wan jî tenê 6 gav in. Akgul, rave kir ku têkiliya rasterast bi gardiyanan re qedexe ye û têkiliya bi xwezayê re, weke roj, baran û berfê, hema hema ne mumkin e. Akgul, her wiha destnîşan kir ku ew 24 saetan bi kamerayan têne şopandin û vemirandina kamerayan dibe sedema cezayên dîsîplînê.
‘SÎSTEMEKE TECRÎDÊ YE KU MIROV JI MIROVAN Û XWEZAYÊ VEDIQETÎNE HATIYE AVAKIRIN’
Akgul, da xuyakirin ku ev sîstem hem mirovan ji mirovan û hem jî ji xwezayê vediqetîne û diyar kir ku li dijî van pêkanînan ew û Ufuk Keskîn ji bo daxwaza veguhastinê ketine greva birçîbûnê. Akgul, diyar kir ku piştî ku daxwazên wan hatine qebûlkirin, ew di 11’ê Tîrmehê de hatiye berdan û got ku di dema greva birçîbûnê de wî 20 kîlo winda kiriye.
‘DAXWAZA SERKAN ONUR YILMAZ, KU DI QONAXA KRÎTÎK DE YE DIKARE WERE BI CIH ANÎN’
Akgul, ragihand ku Serkan Onur Yilmaz, ku 268 roj in di greva birçîbûnê ya bêdawî de ye, di rewşek krîtîk de ye, ew neçar e ku bi kursiya bi teker tevlî hevdîtinan bibe û got ku di laşê wî de tevizîn û birîn çêbûne. Akgul, anî ziman ku daxwaza Yilmaz tenê ew e ku hevalên wî ji girtîgeha bi tîpa bîrê sewqî girtîgehên din kirine û got ku ev daxwaz bi hêsanî dikare were bi cih anîn.
‘TÊKOŞÎNA LI DIJÎ GIRTÎGEHÊN BI TÎPA BÎRÊ ÊDÎ NE TERCÎHEK, MECBÛRIYETEK E’
Akgul, Wezareta Edaletê berpirsiyar girt û banga hestiyariyê li raya giştî kir. Akgul, da zanîn ku girtîgehên tîpa bîrê ji bo her kesî xetereyek in û diyar kir ku ev avahî bûne navendên êşkence û tunekirinê.
Akgul, destnîşan kir ku pergalên mîna vê li Dewletên Yekbûyî ji ber xwekuştinan hatine girtin, lê li Tirkiyeyê ev dane têne veşartin û bang li tevahiya civakê kir ku li dijî girtîgehên tîpa bîrê tevbigerin û têbikoşin. Akgul, anî ziman ku divê her kes xwedî li girtiyên di greva birçûbûnê de ne derkevin û diyar kir ku girtina van girtîgehan êdî mecbûriyetek e.
