Li gorî rapora Rêxistina Efûyê ya Navneteweyî, di 8-9’ê Adara 2025’an de li Banyasê zêdeyî 100 kes hatin qetilkirin. Rêxistinê 32 kuştinan bi berfirehî lêkolîn kir û diyar kir ku di êrîşan de bi zanebûn sivîlên Elewî hedef hatine girtin.
Şahidên bûyerê ragihandin ku kesên çekdar pêşî mezhebên qurbaniyan lêkolîn kirine û piştre wan kuştine. Her wiha hat diyar kirin ku berpirsyar bêyî ku bihêlin malbatên qurbaniyan cenazeyên xwe li gorî merasîmên olî veşêrin, di gorên komî de veşartine.
Sekreterê Giştî yê Rêxistina Efûyê Agnes Callamard got, “Delîlên ku me berhev kirine nîşan didin ku komên alîgirên hikûmetê bi zanabûn êrîşî sivîlên Elewî kirine û ji mesafeyeke nêz sivîlan înfaz kirine.”
Gallamard got, “Kuştina sivîlan an jî şervanên bêçek sûcê şer e. Ji bo ku sûcdar bên darizandin divê lêpirsînên serbixwe û bi bandor bên kirin.”
Serokkomarê nû yê Şamê Ehmed El-Şeraa di 9’ê Adarê de ragihan ku wan komîsyoneke lêpirsînê ava kirine. Lê Rêxistina Efûyê, diyar kir ku ji bo ev komîsyon hê bi bandortir û serbixwetir bikaribe xebata xwe bike, divê ji aliyê hêz, pispor û çavkaniyên pêwîst ve were xurtkirin.
Rêxistina Efûyê, da zanîn ku binpêkirinên mafan li Sûriyeyê bi salane bêceza hatine hiştin û diyar kir ku ji bo sûcên bi vî rengî dubare nebin divê mekanîzmeyên hesab xwestinê bên avakirin.
