Komeleya Rojnamegeran a Dîcle û Firatê (DFG), Komeleya Rojnamegerên Jin ên Mezopotamyayê (MGK), DÎSK-Basin-Îş, Haber-Sen, Yekitiya Rojnamegerên Ewropayê, Cemiyeta Rojnamegerên Başûr û Rojhilat, têkildarî 3’ê Gulanê Roja Azadiya Çapemeniyê ya Cîhanê li avahiya Yekîtiya Mulkiyeyan a navçeya Çankaya ya Enqereyê daxuyanî dan. Di daxuyaniyê de pankarta li ser “Ji rojnamegerên girtî re azadî” dinivisî hat daliqandin. Metna daxuyaniyê rojnamevan Dîren Yurtsever xwend.
Dîran Yurtsever diyar kir ku Tirkiye di azadiya çapemeniyê de ji nav 180 dewletan cîhanê de di rêza 163’an de cih digire û da zanîn ku rojnamevan ji ber kar û xebatên xwe tên girtin. Dîren Yurtsever destnîşan kir ku bi girtina rojnamevanan mafê wergirtina agahiyan a gel jî tê astengkirin.
Dîren Yurtsever xwest sepanên li pêşiya rojnamevaniyê wek astengî disekinin bên bidawîkirin û ev daxwaz rêz kirin:
“*Divê rojnamevanên girtî demildest bên berdan.
*Divê sepanên ku xebatên rojnamevaniyê weke ‘Sûc’ bi nav dike demildest bi dawî bibin.
*Qanûnên ku li pêşiya azadiya raman û xebatên rojnamevaniyê ne divê bên rakirin.
*Ji bo rojnamevanan divê ewlehiya kar pêk were û sepanên li pêşiya mafê sendikabûyînê ne bên rakirin.”
Piştî daxuyaniyê nav û nameyên rojnamevanên girtî hatin xwendin û daxwaza azadiya wan kirin.
