Şandeya DEM Partî û DBP’ê di çarçoveya serdanên xwe yên li Başûrê Kurdistanê de îro êvarê serdana ofîsa sereke ya Tevgera Helwest ya li bajarê Silêmaniyê kir.
Di nava şandeya DEM Partî û DBP’ê ku serdana Başûrê Kurdistanê kiriye de, Hevserokê DBP’ê Keskîn Bayindir, Hevberdevkên Têkiliyên Derve yên DEM Partiyê Berdan Ozturk û Ebrû Gunay, Parlamentera DEM Partiyê ya Mêrdînê û Amîra Îdarî ya Meclisa Tirkiyeyê Saliha Aydenîz û Endama Tevgera Jinên Azad (TJA) Adalet Fîdan cih digirin. Herwiha Nûnerên Partiya DEM’ê yên li Silêmaniyê Mûslûm Kaplan û Fevziye Şîran jî li gel şandeyê ne.
Şande ji aliyê endamên Desteya Rêveber ya Tevgera Helwest Dr. Rêbwar Kerîm û Dr. Xalib Mihemed ve hate pêşwazîkirin.
Piştî civînê, konferanseke çapemeniyê lidar xistin û Rêbwar Kerîm di konferansê de got: “Em gelek kêfxweş bûn û gelek pê şa bûn ku şandeya DEM Partî û DBP’ê hatin serdana me. Em wek Tevgera Helwest bi kêfxweşiyê ve careke din dubare dikin ku pêvajoya aştiyê gelekî girîng e û bi her awayî piştgirî jê re dikin. Çi di Parlementoya Herêma Kurdistanê de û çi di nav Herêmê û Iraqê de amade ne ji bo têkoşînê ji bo vê projeya çareseriyê ye. Piştî Banga birêz Ocalan dem hatiye ku Tirkiye qanûn û destûrên xwe yên bingehîn li gorî vê pêvajoyê biguherîne da ku hemû gelên Tirkiyê bikarin di nav sîstemeke demokratîk de bijîn. Lê divê ev jî bê zanîn ku aştî bi girtîgehê nayê sepandin lê di azadiyê de tê bidestxistin. Ji ber vê yekê em daxwaz dikin ku hemû girtiyên siyasî yên Kurd li Tirkiyê werin azadkirin.”
Her wiha Parlamentera Mêrdînê û Amîra Îdarî ya Meclisa Tirkiyeyê Saliha Aydenîz axivî û got: “Spasiya pêşwazîkirin, helwest û piştgiriya Tevgera Helwest dikin, wek hûn dizanin Rêber Apo ji bo çareserkirina pirsgirêka Kurd û demokratîkirina Tirkiyê rol û berpirsyariya dîrokî xistiye stûyê xwe. Pêvajoyeke nû destpê kiriye, ji bo serkeftina wê pêvajoyê û pêkhatina aştî û demokrasiyê û destxistina wê, erk û berpirsyarî dikeve stûyê me hemûyan.”
