Şandeya DEM Partî û DBP’ê di çarçoveya serdanên xwe yên partiyên siyasî û rêxistinên Başûrê Kurdistanê de bi şandeya KNK’ê re civiya.
Di nava şandeya DEM Partî û DBP’ê ku serdana Başûrê Kurdistanê kiriye de, Hevserokê DBP’ê Keskîn Bayindir, Hevberdevkên Têkiliyên Derve yên DEM Partiyê Berdan Ozturk û Ebrû Gunay, Parlamentera DEM Partiyê ya Mêrdînê û Amîra Îdarî ya Meclisa Tirkiyeyê Saliha Aydenîz û Endama Tevgera Jinên Azad (TJA) Adalet Fîdan cih digirin. Herwiha Nûnerên Partiya DEM’ê yên li Silêmaniyê Mûslûm Kaplan û Fevziye Şîran jî li gel şandeyê ne.
Di hevdîtinê de ‘Banga Aştî û Civaka Demokratîk’ ya Rêber Apo ku ji bo çareseriya pirsgirêka gelê Kurd û Rojhilata Navîn bi rêya Şandeya Îmraliyê ji raya giştî ya cîhanê re ragihand, hate gotûbêjkirin. Her wisa di civînê de tekezî bi serxistina pêvajoya çareserî û aştiyê ku ji aliyê Rêber Apo ve hatiye destpêkirin, hate kirin.
Di hevdîtina Şandeya DEM Partî û DBP’ê ya bi Şandeya KNK’ê re erk, mîsyon û berpirsyartiya hemû aliyên siyasî yên Kurd di pêvajoya çareseriyê de hate nirxandin. Her wisa bal kişandin ser girîngiya pêngav avêtina dewleta Tirk li beramberî pêngavên ji aliyê Tevgera Azadiyê ya Kurd ve hatine avêtin û hate diyarkirin ku divê Tirkiye xwe li gorî pêvajoya çareseriyê pêngavên ber çav bavêje û xwe bi pêvajoyê re bi guncîne.
